Bektas Beknazarov: Qaýipsizdik Keńesi naqty konstıtýtsııalyq organǵa aınaldy
«Búgin Parlament Senaty «Qazaqstan Respýblıkasynyń Qaýipsizdik Keńesi týraly» QR Zańyn qabyldady. Bul turǵyda osyǵan deıin Qaipsizdik Keńesi týraly, onyń quzyreti men múkindigi jóninde arnaıy zań bolmaǵan edi. Bul baǵyttaǵy másele qoǵamda kóp talqylandy, jurtshylyq habardar. Al endi osy qabyldanǵan Zań Qaýipsizdik Keńesiniń jumysyna naqty ári turaqty baǵyt berip otyr. Elbasynyń el ómirindegi tarıhı mıssııasyna baılanysty, ol Qaýipsizdik Keńesin ómir boıy basqarý quqyǵyna ıe bolyp otyr», - dedi senator.
Beknazarovtyń atap ótýinshe, bul Zańmen Qaýipsizdik Keńesiniń memlekettik basqarýdaǵy quzyreti naqtylandy. Ol quzyreti úlken máselelerdi Elbasynyń basqarýymen, sonymen qatar óte mańyzdy memlekettik organdar basshylarynyń qatysýymen sheshýge negizdelgen.
Sonymen qatar ol keshe ǵana Qaýipsizdik Keńesiniń otyrysy ótkenin, onda memlekettiń ómirine, halyqtyń áleýmettik jaǵdaıyna qatysty óte mańyzdy máseleler qaralǵanyn eske salyp ótti.
«Qazir qarap otyrsaq, ulttyq qaýipsizdik, jalpy memlekettik qaýipsizdik, qorǵanys máselelerin árbir memleket óte joǵary deńgeıge shyǵaryp otyr. Sondyqtan QR Parlamenti bul máseleni Májiliste qarady, sondaı-aq Senat otyrysynda talqylady. Endi Qaýipsizdik Keńesiniń naqty konstıtýtsııalyq organǵa aınalǵandyǵyn osy Zańnan kórýge bolady. Bul turǵyda onyń quzyreti óte úlken», - dedi Bektas Beknazarov.
Budan buryn habarlanǵandaı, QR Parlamenti Senatynyń jalpy otyrysynda «Qazaqstan Respýblıkasynyń Qaýipsizdik Keńesi týraly» QR Zańy qabyldandy.
Jalpy, qujat Qaýipsizdik Keńesiniń quqyqtyq mártebesin, qyzmetiniń negizderin, mindetteri men fýnktsııalaryn aıqyndaıdy. Sonymen qatar Qaýipsizdik Keńesiniń Tóraǵasy men músheleriniń ókilettigi, Qaýipsizdik Keńesiniń qyzmeti belgilendi. Osy oraıda, QK Tóraǵasyna kelesi ókilettikterdi bekitý usynylady: Qaýipsizdik Keńesiniń qyzmetin basqarýdy júzege asyrý; onyń otyrystary men jedel keńesterin shaqyrý; Qaýipsizdik Keńesi týraly erejeni bekitý; zańnamada kózdelgen ózge de ókilettikterdi júzege asyrý. Qaýipsizdik Keńesiniń qyzmetin aqparattyq-taldamalyq jáne uıymdastyrýshylyq jaǵynan qamtamasyz etýdi Qaýipsizdik Keńesiniń Tóraǵasyna baǵynatyn jáne esep beretin Qaýipsizdik Keńesiniń Apparaty júzege asyrady.
Foto: www.youtube.com