Beksultan Nurjekeev Jetisý oblysynyń Qurmetti azamaty atandy

<p>Jetisý oblysynda ádebıetti qoldaý baǵytynda birqatar is-shara atqarylyp jatyr. Qazir oblys ákimdiginiń qoldaýymen jergilikti aqyn-jazýshylardyń kitaptaryn jaryqqa shyǵarý, óńirdegi qalamgerlerge arnaıy stıpendııa taǵaıyndaý sııaqty jumystar dástúrge aınaldy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.&nbsp;&nbsp;</p>

Ásirese, oblys oqyrmandarynyń aǵa býyn jazýshylarǵa degen yqylasy erekshe. Bul qatarda belgili jazýshy Beksultan Nurjekeev te bar. Qalamger Jetisý oblysy Panfılov aýdany Aqjazyq aýylynda týǵan. Memlekettik syılyqtyń ıegeri, Qazaqstannyń Halyq jazýshysy. Jetisýlyqtar ony maqtanysh tutady. Jazýshy da eldiń rýhanı ómirinen qalys qalyp kórgen joq. «Kútýmen keshken ǵumyr», «Erli-zaıyptylar», «Jaý jaǵadan alǵanda», «Áı, dúnıe-aı» sııaqty birqatar prozasy jyl saıyn eń kóp oqylǵan shyǵarmalar tiziminde kósh bastap keledi.

El qurmetine bólengen jazýshyny oblystyń atqarýshy bıligi «Jetisý oblysynyń Qurmetti azamaty» ataǵyna laıyqty dep tapqan bolatyn. Taldyqorǵanda Memlekettik syılyqtyń ıegeri, Halyq jazýshysyna «Jetisý oblysynyń Qurmetti azamaty» ataǵy berildi. Qalamgerge bul marapatty óńir ákimi Beıbit Isabaev tapsyrdy. Oblys ákimi jazýshynyń shyǵarmalaryn birneshe býyn urpaq oqyp óskenin, sonyń ishinde ózi de bala kúninen qalamgerdi týyndylary arqyly tanyǵanyn atap ótti. Beıbit Isabaev jazýshynyń shyǵarmashylyq eńbegine tabys tilep, arnaıy ataqtyń lentasyn, tósbelgisi men qujatyn resmı túrde tabystady.

«Týǵan jerimniń bul syıy — maǵan bárinen qymbat. Jetisýdyń men úshin orny qaı kezde de bólek. Osy otyrǵan árqaısylaryńyz úshin de solaı bolýy tıis. Prezıdent ádiletti qoǵam qurý, ádil azamat bolý týraly aıtty. Sol ustanymdy árqaısymyz ózimizden bastaýymyz kerek. Búgingi maǵan kórsetip otyrǵan qurmetterińizge rızashylyǵymdy bildiremin», — dep aıtty Beksultan Nurjekeev.