Bekshın toıda júrgen qyzmetkeriniń vıdeosyna qatysty túsinikteme berdi

ALMATY. QazAqparat - Áleýmettik jelide Almaty qalasynyń sanıtarııalyq-epıdemıologııalyq baqylaý departamenti baspasóz hatshysy Qymbat Qyzaıbekovanyń WhatsApp messendjerinde jarııalaǵan vıdeosy talqylanyp jatyr. Osy jaǵdaıǵa qatysty Jandarbek Bekshın túsinikteme berdi, dep habarlaıdy QazAqparat tilshisi.

Onlaın brıfıng barysynda jýrnalıster Almatynyń bas sanıtarlyq dárigeri Jandarbek Bekshınnen toıda júrgen vıdeosyn jarııalaǵan departamenttiń baspasóz hatshysyna qandaı shara qoldanylatyndyǵyn surady.

«Meniń orynbasarym bul jaǵdaıdy anyqtady. Vıdeo eki jyl buryn túsirilgen. Ol bizde 2020 jyldyń qyrkúıek aıynan bastap jumys isteıdi jáne baspasóz hatshysy emes. Hatshy 25 naýryzda densaýlyǵyna baılanysty jumystan shyqqan bolatyn. Qazir ol orynda Muhamedııarov otyr. Vıdeodaǵy qyz oǵan mátin aýdarýǵa kómektesedi. Ol memlekettik qyzmetker emes. Vıdeo pandemııaǵa deıin túsirilgen», - dedi Jandarbek Bekshın.

BAQ ókilderi vıdeodaǵy mátin jazý fýnktsııasy tek 2020 jyldyń sońynda paıda bolǵanyn kórsetip turǵanyn aıtty.

«Muny onda tájirıbeli tergeýshi anyqtaýy kerek. Qazir ol tehnıkalyq qyzmetker, 10 kún ýaqytsha jumys isteıdi. Biz baspasóz hatshysynyń ornyna jańa konkýrs jarııalaımyz. Egjeı-tegjeıli tergeý júrgizemiz. Biraq, ázirshe oqıǵanyń bir apta nemese bir aı buryn bolǵanyn dáleldeı almaımyz», - dep jaýap berdi ol.