Bekireni zańsyz saqtaǵan atyraýlyq 9,7 mln teńge zalaldy ótemegeni úshin jazalandy

<p>ATYRAÝ. KAZINFORM &ndash; Atyraý turǵyny 20,8 keli bekireni zańsyz saqtap, memleketke 9,7 mln teńge keltirgen. Sot úkimimen memleketke keltirilgen zalal ótemegen turǵynnyń bas bostandyǵyn shekteý jazasy bas bostandyǵynan aıyrýǵa aýystyryldy.&nbsp;</p>

Atyraý oblystyq soty baspasóz qyzmetiniń málimetinshe, sottalýshyǵa bekire tuqymdas balyqtardy zańsyz saqtaǵany úshin QR Qylmystyq kodeksiniń 339-babynyń 2-bóliginiń 5-tarmaǵymen aıyp taǵylǵan.

«Birinshi satydaǵy sot ony 20,8 keli bekire tuqymdas balyqty zańsyz saqtap, memleketke 10,7 mln teńge kóleminde iri zalal keltirgeni úshin kináli dep tanydy. ️QR Qylmystyq kodeksiniń 60-babynyń 1 jáne 4-bóligimen shyǵarylǵan úkimderdiń jıyntyǵy boıynsha sottalýshynyń bas bostandyǵy 3,5 jylǵa shekteldi. Odan memleket paıdasyna 9,7 mln teńge múliktik zalal óndirildi. Prokýror úkimmen kelispeı, jazanyń qylmystyq quqyq buzýshylyqtyń aýyrlyǵyna jáne sottalýshynyń jeke basyna sáıkes kelmeıtinin kórsetip, apellıatsııaǵa ótinishhat joldady», - dep habarlady oblystyq sottyń baspasóz qyzmeti. 

Apellıatsııany qaraý kezinde tómendegi jaıttar anyqtalǵan.

«Sot jaza taǵaıyndaý barysynda sottalýshynyń qylmys jasaǵan kezde burynǵy úkim boıynsha bas bostandyǵyn shekteý jazasyn ótep júrgenin jáne probatsııalyq baqylaýda bolǵanyn eskermegen. Sottalýshy buǵan qaramastan túzelý jolyna túsýdi qalamaı, taǵy da aýyr sanattaǵy qylmys jasaǵan. Sonymen qatar, sottalýshy 9,7 mln teńge shyǵyndy ótemegen», - dep málim etti sottyń baspasóz qyzmetinen. 

Sot baıandalǵan jaıtty eskerip, sottalýshyǵa qatysty úkimdi ózgertti. 

«Sottalýshyǵa QR Qylmystyq kodeksiniń 60-babynyń 1, 4-bólikterin qoldanyp, atalǵan qujattyń 339-babynyń 2-bóliginiń 5-tarmaǵymen 3,5 jylǵa bas bostandyǵynan aıyrý jazasyn taǵaıyndady. Sottalýshy sot zalynan qamaýǵa alyndy», - dep naqtylady sottyń baspasóz qyzmetinen. 

Eske sala ketelik, buǵan deıin Atyraý soty alaıaqtarǵa aldanǵan 220 úleskerdiń talabyn qanaǵattandyrǵan edi.