Bekire-2024: Brakonerlerge «qamqorshylyq» kórsetetin laýazymdylar anyqtalýy múmkin

<p>ATYRAÝ. KAZINFORM &ndash; Atyraý oblysynyń polıtseıleri &laquo;Bekire &ndash; 2024&raquo; keń aýqymdy balyq qorǵaý aktsııasyna belsene kiristi. Tártip saqshylary brakonerlerge &laquo;qamqorshylyq&raquo; tanytatyn laýazymdy adamdardy anyqtaýdy kózdep otyr.</p>

«Úsh oblys aýmaǵynda 1 sáýirde bastalǵan «Bekire – 2024» jedel-profılaktıkalyq is-sharasynyń kózdegen maqsaty anyq. Bul – balyq pen balyq ónimderiniń zańsyz aınalymyn anyqtaý, brakonerliktiń jolyn kesý. Aktsııa kezinde respýblıkalyq, oblystyq jáne jergilikti mańyzy bar joldyń boıynda mobıldi beketter jumys isteıdi», - dep habarlady departamenttiń baspasóz qyzmeti.

Polıtsııa Atyraýdan Batys Qazaqstan, Aqtóbe, Mańǵystaý jáne Reseıdiń Astrahan oblysy baǵytyndaǵy jolmen júretin kólikterge baqylaý júrgizedi. Mundaı baqylaýdan Inder aýdanyna, Isataı aýdanyndaǵy Janbaı, Atyraý qalasynyń mańyndaǵy Damby aýylyna qatynaıtyn jol da tys qalmaıdy.

«Balyq qorǵaý is-sharasy kezinde shekara mańyndaǵy memleketterdiń tıisti organdarymen yntymaqtastyq sheńberinde uıymdasqan qylmystyq toptardyń áreketiniń aldyn alýǵa, jolyn kesýge, zańsyz aýlanǵan balyq ónimderin satyp alý jáne satý naryǵyn joıýǵa basa mán beriledi. Brakonerlerge «qamqorshylyq» kórsetetin laýazymdy adamdardy anyqtaýǵa baǵyttalǵan arnaıy jedel-izdestirý is-sharasy ótkiziledi», - dep málim etti departamenttiń baspasóz qyzmetinen.

Eske sala ketelik, buǵan deıin elimizdiń batysynda keń aýqymdy balyq qorǵaý aktsııasy bastalǵanyn habarlaǵan bolatynbyz.