Beknur Qısyqov mıtıng týraly zań jóninde: Bul - mańyzdy ózgeris

ALMATY. QazAqparat – Almaty qoǵamdyq keńesiniń múshesi Beknur Qısyqov «Qazaqstan Respýblıkasynda beıbit jıyndar, sherý, pıketter, demonstratsııalyq jınalystardy ótkizý men uıymdastyrý tártibi týraly» jańa zań jobasyna qatysty oıyn bildirdi, dep habarlaıdy QazAqparat tilshisi.

Ol QR Aqparat jáne qoǵamdyq damý mınıstri Dáýren Abaevtyń qoǵam belsendilerimen, azamattyq qoǵammen kezdesýin joǵary baǵalady.

«Zań jobasy óte jaqsy. Keı pýnktilerin tolyqtyrý, al keıbirin ózgertý kerek. Bul qujat jańa bolǵandyqtan, onyń jaǵymdy tusy kóp. Zań jobasy boıynsha talqy bastalyp ketti. Bul ádette óte jaqsy. Al mıtıng jaıyna keletin bolsaq, bul jıyndar basqa adamdardyń qımyl-qozǵalysyna, júrip-turýyna, qaýipsizdigine kedergi keltirmeýi kerek. Almatyda halyq kóp turady. Bul másele ashyq talqyǵa tústi. Jaqyn arada ortaq toqtamǵa kelemiz degen oıdamyn», - deıdi Beknur Qısyqov.

Sarapshynyń aıtýynsha, mıtıng ótkizý úshin ruqsat suraý endi kerek emes, tek aldyn ala eskertý bolsa jetkilikti.

«Mıtıng ótkizýge arnaıy ruqsat kerek emes, tek jazbasha habarlaý kerek. Bul jerde tek merzimi ǵana suraq týǵyzady. Biz 10 nemese 15 kún merzim usyndyq. Bul tehnıkalyq másele jaqyn arada sheshimin tabady», - dedi Qısyqov.

Onyń aıtýynsha, jańa zań saılaýǵa deıin qabyldanady.