Bekitip úlgermedik: Pavlodarda shatyry ushqan saýda úıi jaǵdaıdy túsindirdi

PAVLODAR. QazAqparat - Búgin shatyry opyrylyp, jazǵy dámhananyń tóbesine bir-aq túsken «Artýr-1» saýda úıiniń basshylyǵy tótenshe jaǵdaıǵa túsinik berdi, dep habarlaıdy QazAqparat tilshisi.

«Malaısary kóshesinde ornalasqan «Artýr-1» saýda úıinde shatyr jóndeý jumystary júrgizilgen bolatyn. Bekitýge múmkindik bolmady, úlgermedik. Ony qatty jel ushyryp túsirdi», - dep jazdy saýda ortalyǵynyń ákimshiligi Instagram paraqshasynda.

Sondaı-aq, qazir oqıǵanyń sebebin anyqtaý úshin ishki tergeý júrgizilip jatqany habarlandy.

«Zardap shekkenderden keshirim suraımyz» delingen habarlamada.

Oqys oqıǵa búgin túste bolǵan. Saýda ortalyǵy ǵımaratynyń búıir jabyny jazǵy dámhananyń ústine opyrylyp túsken.

Jergilikti atqarýshy organdardyń málimetinshe, jalpy qulaǵan aýmaq - 300 sharshy metr.

Al opyrylǵan shatyrdyń astynda qalǵan eki adam aýrýhanada jatyr.