Bekireni zańsyz tasymaldaǵan azamat sottaldy - Atyraý

ATYRAÝ. QazAqparat –Atyraý oblysynda 4 kg bekireni zańsyz tasymaldaǵan turǵynnyń bas bostandyǵy shekteldi, dep habarlaıdy QazAqparat.

Oblystyq sottyń baspasóz qyzmetinen habarlaǵandaı, bıylǵy 28 sáýirde saǵat 16:35-te Mahambet aýdanyndaǵy Esmahan eldi mekeniniń tusynda «Toıota-Ipsýn» markaly avtokóligi toqtatylǵan. Kólikti tekserý kezinde jalpy salmaǵy 4 kılogramm eki bekire balyǵy tabylǵan.

«Mahambet aýdandyq sotynda qysqartylǵan tártipte qaralǵan is barysynda kólik júrgizýshisiniń paıdalanýǵa tyıym salynǵan baǵaly bekire balyǵyn zańsyz tasymaldaǵany dáleldendi. Kólik júrgizýshisi óziniń kinásin moıyndap, jeńil jaza taǵaıyndaýdy surady» -dep habarlady oblystyq sottyń baspasóz qyzmeti.

Sot úkimimen quqyq buzýshy QR Qylmystyq Kodeksiniń 339-babynyń 1-bóligimen kináli dep tanylyp, 2 jyl merzimge ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq, paıdalanýǵa tyıym salynǵan túrlerimen, olardyń bólikterimen nemese derıvattarymen baılanysty laýazym men qyzmetpen aınalysý quqyǵynan aıyryldy. Oǵan 1 jyl merzimge bas bostandyǵyn shekteý jazasy taǵaıyndaldy.