Bekire-2023: 36 qylmystyq is qozǵalyp, 15,7 mln teńge aıyppul salyndy

ASTANA. QazAqparat – Ekologııa jáne tabıǵı resýrstar mınıstrligi balyq sharýashylyǵy komıteti tóraǵasynyń orynbasary Aıan Bahııanov zańsyz balyq aýlaýdyń aldyn alý jáne kúresý maqsatynda uıymdastyrylǵan aktsııanyń qorytyndysyn tanystyrdy, dep habarlaıdy QazAqparat tilshisi.

«Bıyl 27 naýryzda bizdiń mınıstrlik pen ulttyq qaýipsizdik komıtetiniń bekire jáne basqa da balyq túrlerin qorǵaý, sondaı-aq olardyń ýyldyryq shashýy kezinde qaýipsizdikti qamtý maqsatynda «Jaıyq-Kaspıı» basseıniniń sý aıdyndarynda «Bekire-2023» aktsııasyn ótkizý týraly birlesken buıryq shyqty», - dedi Aıan Bahııanov OKQ-de ótken brıfıngide.

Bekire-2023 aktsııasy bastalǵaly balyq sharýashylyǵy ınspektsııasynyń ınspektorlary, ishki ister organdary jáne Ulttyq qaýipsizdik komıteti shekara qyzmeti mamandary birlesip tabıǵat qorǵaý zańnamasyn buzý faktilerin anyqtap, 972 zańsyz árekettiń jolyn kesken.

Nátıjesinde 669 aıypty ákimshilik jaýapkershilikke tartyldy.

«Sırek kezdesetin jáne quryp ketý qaýpi bar balyq túrlerin zańsyz aýlaý faktileri boıynsha 36 qylmystyq is qozǵaldy. Zań buzýshylarǵa 15,7 mln teńge aıyppul salyndy. Sondaı-aq, 68 tonna 300 keli balyq zańsyz aınalymnan alyndy. Onyń ishinde 1001 keli bekire, 29,5 keli bekireniń ýyldyryǵy bar. Odan bólek, 295 balyq aýlaý quraly, 76 sý kóligi jáne 13 avtokólik, jalpy sany 743 zańsyz balyq aýlaý quraly tárkilendi», - deıdi balyq sharýashylyǵy komıtetiniń mamany.