Bek Nurmaǵanbet venesýelalyq boksshyny ekinshi raýndta nokaýtqa jiberdi

SAPOPAN. QazAqparat – Qazaqstandyq boksshy Bek Nurmaǵanbet (9-0, 7 KO) Sapopandaǵy (Meksıka) Saýl «Kanelo» Alvares pen Djon Raıder aıqasynyń anderkardynda kezekti jekpe-jegin ótkizdi, dep habarlaıdy QazAqparat Sports.kz portalyna silteme jasap.

Nurmaǵanbettiń qarsylasy – Venesýela ókili Arhenıs Espanıa (15-1, 14 KO). Olardyń sýperorta salmaqtaǵy jekpe-jegi segiz raýndqa josparlanǵan bolatyn, biraq sońyna jetpeı, ekinshi úsh mınýttyqtaǵy nokaýttan keıin qazaqstandyq jeńimpaz atandy.

Osylaısha, Bek kásipqoı bokstaǵy onynshy jeńisine jetse, Espanıa ekinshi ret jeńildi.

Boks keshiniń anderkardynda jeńilmegen qazaqstandyq boksshy Ábilhan Amanqul da (4-0, 4 KO) meksıkalyq Fabıan Rıos Fraýstony (7-7-3, 4 KO) nokaýtqa jiberip, jeńiske jetkenin aıta keteıik.