Bek Nurmaǵanbet pen Ábilhan Amanqul AQSh-ta jekpe-jek ótkizedi

ASTANA. QazAqparat – Jeńilip kórmegen qazastandyq boksshylar Bek Nurmaǵanbet (8-0, 6KO) pen Ábilhan Amanquldyń (2-0, 2KO) rıngke oralatyn kúni belgilendi, dep habarlaıdy QazAqparat.

«Qazaqstannyń kásibı boksy» paraqshasynda BoxRec.com aqparatyna súıenip málim etilgendeı, sportshylardyń kelesi aıqasy 15 sáýirde Pomona qalasynda (AQSh, Kalıfornııa shtaty) ótedi. Olardyń qarsylastarynyń kim ekeni ázirge aıtylmady.

Buǵan deıin jazǵanymyzdaı, qazirgi ýaqytta Nurmaǵanbet pen Amanqul ekinshi orta salmaqtaǵy absolıýtti álem chempıony Saýl «Kanelo» Alvares pen San-Dıegoda bir zalda daıyndalyp jatyr.
Otandyq boksshylar buǵan deıin byltyr 22 qazanda Meksıkada aıqas ótkizdi: Bek tehnıkalyq nokaýtpen úshinshi raýndta jergilikti boksshy Lýsıano Chaparro Araýhony (7-6-3, 3KO) jeńse, Ábilhan ekinshi raýndta taǵy bir meksıkalyq Ieassona Pachekony (6-1, 3KO) nokaýtqa jiberdi.