Bek Air ushaq apaty: Azamattyq avıatsııa komıteti Bas prokýratýranyń málimetine jaýap berdi
Buǵan deıin QR Bas prokýrory Berik Asylovtyń Májilis depýtattarynyń saýalyna jaýap bergen edi.
Onda Astanadaǵy sybaılas jemqorlyqqa qarsy is-qımyl departamenti Azamattyq avıatsııa komıteti qyzmetkerleriniń ústinen «Fokker-100» ushaǵynyń Almaty irgesindegi apatyn tergep jatqany aıtylǵan.
«Astanadaǵy sybaılas jemqorlyqqa qarsy is-qımyl departamenti Azamattyq avıatsııa komıteti qyzmetkerleriniń ústinen Qylmystyq kodekstiń 370-baby 4-bóliginiń 1-tarmaǵy (qyzmettegi əreketsizdik) boıynsha 2018 jyly «Fokker-100» ushaǵynyń apatqa ushyraýyna əkep soqqan Almaty qalasy əýe aılaǵynyń ushýǵa jaramdylyǵy sertıfıkatyn zańsyz berý jónindegi qylmystyq isti tergep-tekserýde. Laýazymdy adamdardyń is-əreketine túpkilikti baǵalaý tergeý qorytyndysy boıynsha beriletin bolady», - dep jazylǵan jaýapta.
Komıtet ókilderi atalǵan qylmystyq is boıynsha tergeý oryndarymen belsendi jumys istep jatqandaryn, alaıda áýe aılaǵyna zańsyz berilgen jer zańnama boıynsha aılaqtardyń jaramdylyǵy týraly sertıfıkat berýden bas tartýǵa negiz bola almaıtynyn aıtyp otyr.
«Áýe aılaqtaryn sertıfıkattaý jáne jaramdylyq sertıfıkatyn berý tártibi «Áýeaılaqtardyń (tikushaq aılaqtarynyń) jaramdylyǵyn sertıfıkattaý jáne olarǵa sertıfıkat berý qaǵıdalaryn bekitý týraly» QR Investıtsııalar jáne damý mınıstriniń buıryǵymen reglamenttelgenin atap ótemiz. Bul rette, jergilikti atqarýshy organdardyń jer ýchaskelerin zańsyz berýi saldarynan paıda bolǵan áýe aılaǵy mańyndaǵy aýmaqta obektilerdiń bolýy sertıfıkattyq zerttep-qaraý nysanasy bolyp tabylmaıdy jáne áýe aılaqtarynyń jaramdylyq sertıfıkatyn berýge kedergi bola almaıdy», - delingen vedomstvonyń baspasóz qyzmeti taratqan aqparatta.
Sondaı-aq, vedomstvo mamandary Almaty irgesinde ushaqtyń qulaýyna áýe kemesiniń qanatyndaǵy aqaýlar sebep bolǵanyn eske salady.
«Avıatsııalyq oqıǵany tekserýdiń qorytyndy esebi boıynsha, «Bek Eır» AQ áýe kemesimen bolǵan avıatsııalyq oqıǵany zerttegen komıssııa áýe kemesiniń apaty ushaq áýege kóterilgen kezde qanatynyń kúsh túsetin qasıetteriniń sımmetrııasyn joǵaltýynan bolǵanyn anyqtady. Sonyń kesirinen ushaq ushý-qoný jolaǵynan kóterilgennen keıin fıýzelıajǵa qulap, qar basqan topyraqtyń betimen ońǵa qaraı aýyp ketken, odan keıin áýejaıdyń perımetr boıynsha qorshaýyn buzyp, atalǵan qorshaýdan 9-10 metr qashyqtyqta ornalasqan eki qabatty jeke menshiktegi qurylys nysanyna soǵylǵan. Komıssııa qorytyndysyna sáıkes, ushaq qanatynyń kúsh túsetin qasıetterin joǵaltýynyń sebebi jer ústindegi muzdanýdyń áseri bolýy yqtımal», - dep jazylǵan komıtet málimetinde.