Bek Air ushaǵynyń ekinshi ushqyshynyń jaǵdaıy belgili boldy
54 jastaǵy Mırjan Mýldahýnov № 4 aýrýhanaǵa jetkizildi.
Ushqysh jabyq mı jaraqatymen tústi. Mıy shaıqalǵan, sol jaq beti men shúıde tusy jyrtylǵan. Keýde tusy aýyr soqqy alǵan.
Al áýe kemesiniń komandıri 57 jastaǵy Marat Muratbaev oqıǵa ornynda qaza boldy.
«Tańnan beri jedel járdem bizdiń aýrýhanaǵa 19 adam jetkizdi. Olardyń 11-iniń jaǵdaıy óte aýyr bolǵandyqtan, jansaqtaý bólimine jatqyzyldy. Qazirgi tańda 6 patsıentke shuǵyl ota jasaldy. 8 adam áli jansaqtaý bóliminde jatyr. 2 adam, ókinishke oraı, qaıtys boldy. Basqalarynyń ómiri úshin kúresip jatyrmyz», - dedi № 4 qalalyq klınıkalyq aýrýhananyń bas dárigeriniń mindetin atqarýshy Aıman Baızoldanova.
Onyń aıtýynsha, emhanada shtab quryldy. Patsıentterdiń týystarymen psıhologtar jumys istep jatyr.
Aıta keteıik, búgin tańda Almatydan Nur-Sultan qalasyna ushyp shyqqan ushaq radardan joǵalyp ketti.
Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy. Oqıǵanyń mán-jaıyn anyqtaý úshin ushaq qulaǵan aýmaqqa arnaıy komıssııa ushyp shyqty. Osy apatqa qatysty shuǵyl jeli iske qosylǵan.
QR Prezıdenti Qasym-Jomart Toqaev ushaq apatyna kináliler zańǵa sáıkes qatań jazalanatynyn málimdedi. Elbasy Nur-Sultan Nazarbaev jolaýshylar ushaǵynyń apatqa ushyraýyna baılanysty kóńil aıtty.