Bek Air ushaǵynyń apaty: Sottalyp jatqan sheneýnikter bas bostandyǵynan aıyrmaýdy surady

TALDYQORǴAN. QazAqparat- Almaty oblysynyń Talǵar aýdandyq sotynda áýejaı mańynan zańsyz jer bergen eks-sheneýnikterge qatysty sot aıaqtalýǵa jaqyn. Sottaǵy sońǵy sózin sóılegen eks-sheneýnikter bas bostandyǵynan aıyrmaýdy surady, dep habarlaıdy QazAqparat tilshisi.

Búgin sońǵy sózin sóılegen eks-sheneýnikter óz kinásin tolyq moıyndady jáne qatty ókinetinin jetkizdi.

Olar ózderin basbostandyǵynan aıyrmaýdy surady. Sebebi, olardyń 3-4-ten kámelet jasyna tolmaǵan balalary bar.

Jáne basym bóligi - úıdiń jalǵyz asyrýshylary. Sonymen qatar, olardyń ata-anasy - egde jastaǵy adamdar.

Tek rıeltor Nuraıym Aldanysh qana óz kinásin moıyndamady. Ol óziniń kinási qujatpen dáleldenbegenin aıtty.

Onyń qorǵaýshysy Azamat Bakenov N. Aldanyshtyń bul iske qatysy joq ekenin jetkizdi.

Rıeltordyń kámelet jasyna tolmaǵan 3 balasy bar. Qorǵaýshynyń sózinshe, rıeltor jer satýmen ǵana aınalysqan.

Al rásimdeý jumysymen aınalyspaǵan. Sondyqtan onyń kinási joq ekenin qorǵaýshysy alǵa tartty.

«Rıeltor jerdi satyp ber degen adamdardyń jarnamasy boıynsha jumys istedi. Al sol jerdiń ıeleri bul iste joq. Nuraıym Aldanyshtiń bul iste kinási joq»,- dedi qorǵaýshysy.

Aıta keteıik, buǵan deıingi protseste prokýror eks-sheneýnikterdi, ıaǵnı, barlyq sottalýshylardy 4 jyldan 6 jylǵa bas bostandyǵynan aıyrý jazasyn suraǵan bolatyn. Qazir osy is boıynsha alty adam sottalyp jatyr. Onyń beseýi - eks-sheneýnik.

Olar - Rýstam Turysbekov, Jaras Mashımbaev, Berik Abdýllaev, Medeý Qalybekov, Qaırat Altynbekuly jáne rıeltor Nuraıym Aldanysh.

Rıeltor qamaýda otyr. Al burynǵy sheneýnikter úıqamaqta.

Prokýror Rýstam Turysbekovke - 6 jyl qaýipsizdik deńgeıi tómen túzeý mekemesinde jazasyn óteýge jáne 7 jyl memlekettik qyzmette jumys isteý quqyǵynan aıyrýdy, Jaras Mashımbaevty - 4 jylǵa bas bostandyǵynan jáne ony da 7 jylǵa memlekettik qyzmette jumys isteý quqyǵynan aıyrýdy surady.

Sondaı-aq Qaırat Altynbekulyn 5 jylǵa bas bostandyǵynan aıyrýdy jáne 6 jyl memlekettik qyzmette isteýge tyıym salýdy, Medeý Qalybekov - 4 jyl, Berik Abdýllaevqa - 4,5 jyl, al rıeltor Nuraıym Aldanyshty 5 jylǵa bas bostandyǵynan aýyrý jazasy suraldy.

Prokýrordyń sózinshe, zańsyz úı salý boıynsha sottalýshylardyń kinási qujatpen dáleldengen jáne kýágerlerdiń de dáleli bar.

Sondaı-aq memlekettik aıyptaýshy barlyq úıqamaqta otyrǵan burynǵy sheneýnikterdi sot zalynda qamaýǵa alýdy surady.

Esterińizge sala keteıik, 2019 jyldyń 27 jeltoqsanyńda «Bek Air» áýe kompanııasynyń ushaǵy apatqa ushyrady.

Almaty - Nur-Sultan baǵytyndaǵy ushaq bıiktikti saqtaı almaı, beton qorshaýyn buzyp ótken.

Artynsha eki qabatty turǵyn úıge soǵyldy, 12 adam mert boldy, 69 adam zardap shekti. Onyń 51-i aýrýhanaǵa tústi.