«Bek Air» basshylyǵynyń BAQ aldyna shyqpaýy durys emes – Roman Sklıar

NUR-SULTAN. QazAqparat – «Bek Air» áýe kompanııasy basshylyǵynyń buqaralyq aqparat quraldary aldyna shyǵýdan bas tartýy durys emes. Bul týraly QR Premer-Mınıstriniń orynbasary Roman Sklıar aıtty, dep habarlaıdy QazAqparat tilshisi.

«Menińshe, olardyń BAQ aldyna shyqpaýy durys emes. Olar qaza tapqan jolaýshylardń týystaryna qandaı qoldaý sharalarynyń kórsetiletindigin, zardap shekkenderge qandaı kómek beretindikterin túsindirýi qajet», - dedi ol Úkimet otyrysynan keıin BAQ ókilderine bergen suhbatynda.

Sonymen qatar, vıtse-premer atalǵan áýe kompanııasynyń reısterine satyp alynǵan bıletterdiń qanshasy qaıtarylǵandyǵyna qatysty derektermen bólisti.

«10 qańtarǵa deıingi aralyqqa áýe kompanııasy shamamen 19 myń bılet satqan. Qazirdiń ózinde 9 myńǵa jýyq bılet qaıta tapsyryldy nemese ózge áýe kompanııalarynyń reısterine qaıta brondaldy. Osynaý qıyn jaǵdaıda qajetti kómek kórsetýge sheshim qabyldaǵan Kazakh Air, Scat, Air Astana áýe kompanııalaryna rızashylyǵymyzdy bildirgim keledi. Sonymen qatar, Qazaqstan temir joly basshylyǵyna osyndaı jaǵdaıda jolaýshylarǵa barynsha kómek kórsetý úshin qosymsha poıyz uıymdastyrǵanyna alǵys aıtamyn», - dedi R.Sklıar.