Bek Air áýe kemeleriniń ushýy tirkelgen joq - Azamattyq avıatsııa komıteti

ASTANA. QazAqparat – Azamattyq avıatsııa komıteti «Bek Air» áýekompanııasynyń ushaqtary reıs oryndap júr» degen aqparatqa qatysty túsinikteme berdi, dep habarlaıdy QazAqparat tilshisi.

Mıhaıl Kozachkovtyń áleýmettik jelilerdegi jarııalanymyna qatysty RK 8265 bortynyń QR Qorǵanys mınıstrligine tıesili ekenin habarlaımyz. «Qazaeronavıgatsııa» RMK burynǵy «Bekeır» áýekompanııasyna tıesili áýe kemeleriniń ushýyn tirkegen joq, -

delingen komıtet habarlamasynda.

Aıta keteıik, búgin jýrnalıst Mıhaıl Kozachkov óziniń Telegram arnasynda «Bek Air» áýekompanııasyna tıisili «Fokker-100» ushaǵynyń Almatyǵa reıs oryndaǵanyn jazyp edi.

Qazir avıatorlar chatyna «Bekeır» avıakompanııasynyń «Fokker-100» ushaǵynyń flaıradary (reıs baǵyty) týraly fotolar túsip jatyr. Túsinýimshe, áýe kemesi Almatyǵa ushqan. Biraq, «Bekeır» kompanııasy ushaqtarynyń reıs oryndaýyna osydan 3 jyl buryn tyıym salynǵan. Onda «Bekeır» ushaqtarymen kim ushyp júr? -

dep jazdy Mıhaıl Kozachkov óziniń Telegram arnasynda.

Eske salaıyq, 2019 jyly 27 jeltoqsanda Almaty áýe aılaǵynyń aýmaǵynda «Bek Air» kompanııasynyń «Fokker-100» ushaǵy apatqa ushyraǵan bolatyn. Osydan keıin kompanııanyń ushý lıtsenzııasy toqtatylyp, reısterdi oryndaýyna tyıym salynǵan edi. Áýe kemesiniń apatyna qatysty tergeý bıyl sáýirde aıaqtalyp, onyń sebepteri jarııalandy.