Bed Tax: Týrıstik jarnaǵa belgilengen mólsherleme qoldanylady

ASTANA. QazAqparat – Sheteldikter úshin týrıstik jarnanyń paıyzdyq mólsherlemesin belgilengen stavkaǵa aýystyrý týraly sheshim qabyldandy. Bul jaıynda «Atameken» ulttyq kásipkerler palatasynan málim etti, dep habarlaıdy QazAqparat tilshisi.

«Memlekettik organdar men bıznes ókilderi týrıstik jarnany engizý tetigin talqylaý máseleleri boıynsha birneshe ret kezdesti. Nátıjesinde Bed Tax sheteldikteri úshin týrıstik jarnanyń paıyzdyq mólsherlemesin belgilengen stavkaǵa aýystyrý týraly tujyrymdamalyq sheshim qabyldandy. Endi Astana, Almaty jáne Shymkent qalalary úshin 0,5 AEK jáne qalǵan óńirler úshin 0,2 AEK mólsherinde tirkelgen mólsherleme qoldanylady», - delingen palatanyń resmı saıtynda jarııalanǵan aqparatta.

Týrızm ındýstrııasy komıtetiniń tóraǵasy Dastan Rysbekovtyń aıtýynsha, qaýly men zańnamaǵa tıisti ózgerister engizý biraz ýaqyt qajet etedi.

«Normatıvtik-quqyqtyq aktilerdi qabyldaýdyń qoldanystaǵy rásimderin eskerip, Ulttyq palatamen kelise otyryp, biz QR Úkimetiniń qaýlysyna ózgerister engizý máselesin birinshi kezekte pysyqtaımyz. Ol 1-1,5 aıǵa sozylady. Budan ári jyl sońyna deıin zańnamaǵa ózgerister engizý máselesin pysyqtaımyz», - dedi Dastan Rysbekov.