BTsJ vaktsınasy aýrýdyń damý qaýpin 50% tómendetedi - epıdemıolog

ALMATY. QazAqparat- BTsJ vaktsınasy aýrýdyń damý qaýpin 50%-ǵa azaıtady. Bul týraly Óńirlik kommýnıkatsııalar qyzmetiniń alańynda týberkýlezge qarsy kúres aılyǵyna arnalǵan brıfıngte qalalyq Sanıtarlyq-epıdemıologııalyq baqylaý departamenti basshysynyń orynbasary Ásel Qalyqova málim etti, dep habarlaıdy QazAqparat tilshisi.

Spıker týberkýlezdiń megapolıstegi jaǵdaı men aldyn alýdyń tıimdi ádisterine toqtaldy Aıtýynsha, týberkýlezdiń spetsıfıkalyq profılaktıkasynyń basty maqsaty – vaktsınatsııa. «Vaktsınatsııa jańa týǵan nárestelerge ómirdiń 4-7-shi kúninde júrgiziledi. Birneshe jyldan keıin týberkýlezdiń aldyn alý maqsatynda 7 jastaǵy deni saý balalarǵa (1-synyp oqýshylary) revaktsınatsııa júrgiziledi. BTsJ vaktsınasy aýrýdyń damý qaýpin 50%-ǵa tómendetedi. Vaktsınatsııamen qamtý neǵurlym joǵary bolsa, týberkýlez aýrýy soǵurlym azaıady», - dedi Ásel Qalyqova.

Vaktsınatsııa arqyly týberkýlezdiń aldyn alý ınfektsııa deńgeıiniń tómendeýine, týberkýlezdik menıngıtpen syrqattanýshylyq pen ólim-jitimniń kúrt tómendeýine ákeledi, dep esepteıdi epıdemıolog.

Týberkýlezdiń aldyn alýda eresek turǵyndardy flıýorografııalyq tekserýdiń de tıimdiligi zor. Jyl saıynǵy tekserý týberkýlezben aýyratyndardy der kezinde anyqtaýǵa kómektesedi. Týberkýlezdiń aldyn alý júıesindegi flıýorografııa aýrýdyń erte kezeńderinde emdeýdi bastaýǵa múmkindik beredi, bul - aýrýmen kúrestegi mańyzdy sharttardyń biri.

«Sonymen qatar týberkýlezdiń áleýmettik profılaktıkasy bar, bul halyqtyń turmys jaǵdaıyn jaqsartý, eńbek jaǵdaıyn ońtaılandyrý, ókpe aýrýlarynyń aldyn alý, tamaqtaný sapasyn jaqsartý, maskúnemdikpen, nashaqorlyqpen kúresý., temeki shegý jáne taǵy basqalary», - dep atap ótti epıdemıolog.

Sanıtarlyq-epıdemıologııalyq departament ókili 2022 jyly Almatyda týberkýlezdiń 482 jańa jaǵdaıy anyqtalǵanyn, syrqattanýshylyq kórsetkishiniń 3%-ǵa tómendeýi baıqalatynyn aıtty. «Byltyr týberkýlezben aýyratyndardyń negizgi kórsetkishin jumyssyzdar – 44,2%, zeınetkerler – 18,3%, basqa halyq – 14,1%, bosanǵannan keıingi kezeńdegi áıelder – 1,2% qurady»,- dedi ol.