Bazar ıelerine jeke jaýapkershilik júktelmek

NUR-SULTAN. QazAqparat – Elimizdegi keıbir bazar basshylary saýdagerlerge óz talaptaryn qoıyp, baǵany da ózderi belgileıtini anyqtaldy. Bul týraly QR Saýda jáne ıntegratsııa mınıstrligi saýda komıteti tóraǵasynyń orynbasary Aıdar Ábildabekov málim etti, dep habarlaıdy QazAqparat tilshisi.

«El aýmaǵyndaǵy 114 saýda bazarynyń qyzmetine tekserý júrdi. Nátıjesinde birqatar zańbuzýshylyq anyqtaldy, onyń ishinde salyq zańnamasynyń buzylýy da bar. Saýda salasyndaǵy taǵy bir problema - kassa apparatynyń bolmaýy jáne sanıtarlyq talaptardyń tıisti deńgeıde saqtalmaýy. Bazarlar qyzmetin tekserýdiń nátıjesi saýda salasyna qatysty zańnamaǵa ózgeris engizý talap etiletinin kórsetti. Bul shara elimiz boıynsha saýda salasyn bir tártipke keltirý maqsatynda júrgizilmek. Sonymen qatar, bazar ıelerine jeke jaýapkershilik júktemekpiz. Sebebi, kóp jaǵdaıda bazar ıeleri: «Men saýda ornyn jalǵa berýshimin, baǵaǵa qatysym joq», - deıdi. Mine, osy oraıda jaýapkershilik kerek», - dedi Aıdar Ábildabekov ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, áleýmettik mańyzy bar taýarlardyń baǵa turaqtylyǵyn saqtaý jolynda 2022-2024 jyldarǵa 67 is-shara qarastyrylǵan. Sonyń ishinde azyq-túlik qaýipsizdigin qamtamasyz etýge arnalǵan 31 shara bar.

«Ótken aptada óńirlik ákimdikter azyq-túlik baǵasyn qoldan ósirgen 231 faktini anyqtady. Keıbir saýda oryndarynda áleýmettik mańyzy bar taýarlardyń baǵasy 40 paıyzǵa deıin qymbattap jatady. Túsindirý jumystarynan soń keıbir saýda núkteleri baǵany birden túsiredi. Jalpy, azyq-túlik baǵasyn ósirmeı, turaqtylyqty saqtaý úshin Úkimet bekitken birqatar shara atqarylyp jatyr», - deıdi Aıdar Ábildabekov.

Buǵan deıin mınıstrlik ókili keıbir iri bólshek saýda bazarlary naryq baǵasymen sanaspaıtynyn alǵa tartqan edi.

Odan bólek, Reseıge salynǵan sanktsııalar azyq-túlik daǵdarysyna alyp kelgeni aıtyldy.