Bazalyq mólsherlemeni kóterý kredıtteý qarqynyna teris áser etken joq - UB

ASTANA. QazAqparat – QR Ulttyq bankiniń tóraǵasy Ǵalymjan Pirmatov Májilis depýtattarynyń saýalyna jaýap bere otyryp, eldegi joǵary bazalyq mólsherleme kredıtteý qarqynyna aıtarlyqtaı teris áser etpegenin málim etti, dep habarlaıdy QazAqparat tilshisi.

«Joǵary bazalyq mólsherlemeniń kredıtteý qarqynyna eleýli teris áseri baıqalmaıdy. 2022 jyldyń qorytyndysy boıynsha ekinshi deńgeıdegi bankterden ekonomıkaǵa berilgen kredıtter 22,8 trln teńge boldy. 2022 jylǵy ósim – 23,3%. Zańdy tulǵalarǵa beriletin kredıtter de 11,5%-ǵa 8,7 trln teńgege deıin ósti. Onyń ishinde shaǵyn kásipkerlik sýbektilerine beriletin kredıtter 22,8%-ǵa 4,5 trln teńgege deıin ósti», - dep jazylǵan jaýapta.

Ulttyq bank málimeti boıynsha qazirgi aqsha-nesıe saıasaty naqty sektordyń damý parametrlerin báseńdetpegen.

«Aldyn ala derekter boıynsha 2022 jyly Qazaqstannyń jalpy ishki niminiń ósimi 3,1% boldy. Kásipkerlik belsendilik artyp keledi. Mysaly, 2022 jyly 507 myń kásiporyn tirkelgen. Bul ótken jylmen salystyrǵanda 5,3% artyq. Jumys istep turǵan kásiporyndardyń sany da 13,2% ósti», - dep jazady Ǵalymjan Pirmatov.