Baızaq aýdanynda jastarǵa arnalǵan Bilim ortalyǵy ashyldy
Memleket basshysy, «Nur Otan» partııasynyń tóraǵasy Nursultan Nazarbaev partııaǵa jańa jobalar men mindetterdi tıimdi iske asyrýǵa baǵyttalǵan birqatar naqty tapsyrmalar, sonyń ishinde aımaqtyq kitaphanalardy jańǵyrtý aıasynda jastarǵa arnalǵan bilim ortalyqtaryn ashý týraly tapsyrma bergen bolatyn. Atalǵan joba aıasynda jáne Elbasynyń «Bolashaqqa baǵdar: rýhanı jańǵyrý» maqalasyndaǵy basty mindetterdi iske asyrý maqsatynda aýdandyq ortalyqtandyrylǵan kitaphanada bilim ortalyǵy ashyldy.
Ortalyqtyń ashylý saltanatyna qatysqan aýdan ákimi Rahmatildá Rahmanberdıev jastardy kitap oqýǵa tartýdyń eń tıimdi joly - kitaphanalar júıesin jańǵyrtý bolyp tabylatyndyǵyn, bul baǵytta qolǵa alynǵan jobalardyń jemisin jurtshylyq kórip otyrǵandyǵyn jetkizdi. Táýelsizdik merekesi qarsańynda ashylyp otyrǵan bilim ortalyǵynyń qyzmetine sáttilik tiledi. Aýdandyq Qoǵamdyq keńestiń tóraǵasy Jumanǵalı Qumǵanbaev, túrik etnomádenı ortalyǵynyń jetekshisi Mehııa Radjamov sóz sóılep, izgi tilekterin bildirdi.
Aýdandyq ortalyqtandyrylǵan kitaphanalar júıesiniń dırektory Saltanat Ómirbekova qonaqtar men oqyrmandardy keń ári jaryq bólmege jaıǵasqan ortalyqpen tanystyrdy.
Bilim ortalyǵy tórt alańǵa bólingen: bilim men ǵalamtor, kitap oqý, kofe, jumys alańdary.
Barlyq alańdar qajetti quraldarmen jabdyqtalǵan. Bilim men ǵalamtor alańynda kerekti aqparattardy alyp, álem boıynsha jańalyqtardy bilip, oı-órisin keńeıtýge, teledıdardan qyzyqty baǵdarlamalar men mýltfılmderdi kórýge múmkindik mol. Kelesi alań - kitap oqý alańy. Oqyrmandar jumsaq jıhazǵa otyryp, kitap, merzimdi basylymdar oqıdy, demalady. Kofe alańynda kofe iship, pikir almasady. Jumys alańynda qoǵamdyq emes uıymdar, ujymdar, mekemeler men birlestikter, qyzyǵýshylyq klýbtar ártúrli jıyndar, is-sharalar ótkizedi.
Bilim ortalyǵyn zamanaýı qurylǵylarmen jabdyqtaýǵa jergilikti bıýdjetten 2 mln teńge jumsalǵan.
«Egemen elimizdiń basty merekesi qarsańynda ashylǵan bilim ortalyǵynda jastardyń bilimderin jetildirip, qajetti aqparatty alýyna barynsha jaǵdaı jasalyp otyrǵandyǵy qýantty», - deıdi oqyrman Erjan Ábdibekuly.
Jumys isteýge qajetti keńistik pen yńǵaıly oryndyqtar, jeke jáne toppen jumys isteýge arnalǵan alań, jyldam ınternet pen tegin vaı-faı, prınter men skaner bar.