Baızaq aýdanynda jarylystan zardap shekken 127 nysan jóndeldi
Tótenshe jaǵdaı kezinde barlyǵy 176 jyljymaıtyn múlik zardap shekken desek, onyń ishinde 159 turǵyn úı, 12 kommertsııalyq, 4 áleýmettik jáne 1 ınfraqurylymdyq nysan (jol) bar. 35 úı men 12 kommertsııalyq nysan aıtarlyqtaı búlingen. 48 nysan boıynsha qorytyndy alynǵan.
Búginde qalpyna keltirý sharasyna 12 merdigerlik uıymnyń 22 tehnıkasy men 187 jumysshysy jumyldyrylǵan.
Jeńil zardap shekken 124 turǵyn úı men 3 áleýmettik nysan tolyǵymen qalpyna keltirildi.
Bul týraly aımaq basshysy Berdibek Saparbaev BAQ ókilderiniń qatysýymen ótken brıfıng barysynda habarlap, jóndeý, qaıta qalpyna keltirý jumystary týraly baıandady.
«Zardap shekken nysandardy qalpyna keltirý boıynsha barlyq jumystar Memleket basshylyǵynyń baqylaýynda»,-dedi B.Saparbaev.
Úkimettik komıssııanyń tapsyrmasyna sáıkes nysandardy tekserý jáne qalpyna keltirý úshin jergilikti atqarýshy organdarynan 5 jumys toby qurylyp, qurylys basqarmasynyń, QazQSǴZI, jobalaý uıymdarynyń jáne TJ qyzmetkerleri endi.
Seısmıkalyq qaýipti jaǵdaıdaǵy Jibek joly aýylynyń №5 orta mektebine 150 oryndy jańa ǵımarat salý úshin jobalyq-smetalyq qujattama ázirlendi.
Qurylysy qyzý júrip jatqan jańa bilim oshaǵy 2022 jyldyń qańtar aıynda paıdalanýǵa beriledi dep kózdelip otyr.
«Jalpy 150 mıllıon teńge kólemindegi demeýshilik qoldaý esebinen 127 nysan qalpyna keltirildi. Al, aıtarlyqtaı zardap shekken nysandardy qalpyna keltirý úshin Úkimettik qordan 1,2 mıllıard teńge bólindi. Qalpyna keltirý jumystaryn aǵymdaǵy jyldyń 30 qazanyna deıin aıaqtaý josparlanýda»,- dedi aımaq basshysy.
Sondaı-aq, demeýshilerden «Senim Baızaq» qoryna túsken qarjyǵa qosalqy sharýashylyq qurylystar men joldar jóndeledi.
Budan bólek, Berdibek Saparbaev mertikken 87 áskerı qyzmetshilerge, tótenshe jaǵdaılar departamenti men prokýratýra qyzmetkerlerine oblys ákiminiń rezervinen 100 aılyq eseptik kórsetkish nemese 291,7 myń teńge mólsherinde jalpy somasy 25,4 mıllıon teńge materıaldyq kómek bólinetinin jetkizdi.