«Báıterek» Saýd Arabııasy úshin senimdi seriktes bola alady – Qanat Sharlapaev
Qanat Sharlapaev Qazaqstan Prezıdenti Qasym-Jomart Toqaevtyń Saýd Arabııasyna birinshi sapary ekijaqty yntymaqtastyqty damytýǵa tyń serpin beretinine, sonymen qatar Saýd Arabııasy men Qazaqstan arasyndaǵy saýda-ekonomıkalyq jáne ınvestıtsııalyq yntymaqtastyqty odan ary nyǵaıtý jolynda mańyzdy qadam bolatynyna senim bildirdi.
Basqarma tóraǵasy holdıng qyzmeti jaıynda aıtyp, onyń Qazaqstan ekonomıkasyndaǵy róline toqtaldy. «Báıterek» Qazaqstan Úkimetiniń basty sektorlardaǵy el ekonomıkasyna qoldaý bildiretin negizgi damý ınstıtýty ári qarjy agenti ekendigin atap ótti.
Onyń aıtýynsha, holdıngtiń jıyntyq aktıvi 22 mlrd dollardy quraıdy. Al kapıtaly 3,7 mlrd dollardy qurap otyr. Holdıngtiń jáne onyń 8 portfeldik kompanııasynyń strategııalyq baǵyty ındýstrııalyq-ınnovatsııalyq damý, otandyq ónim eksportyn ilgeriletý, shaǵyn jáne orta kásipkerlikti damytý, AÓK-ti damytý jáne turǵyn úı qurylys salasy sanalady.
Qanat Sharlapaev holdıng «jasyl» qarjylandyrýdy damytýǵa da erekshe nazar aýdaratynyn atap ótti. Máselen, búginde birqatar «jasyl» jobaǵa 700 mln dollardan astam qarjy jumsaldy.
Ol Saýd Arabııasy kásipkerlerin «Báıterek» holdıngimen birge Qazaqstanda jańaratyn energııa kózderine qatysty jobalardy birlesip júzege asyrýǵa shaqyrdy. Óıtkeni, Saýd Arabııasynyń bul baǵytta mol tájirıbesi bar.
«Báıterek» holdınginiń tóraǵasy sózin qorytyndylaı kele, geosaıası aıqynsyzdyq oryn alyp otyrǵan qazirgi álemde senimdi seriktestiń bolýy uzaq merzimdi turaqty tabystyń kepili bolatyndyǵyna nazar aýdartty. Sonymen qatar holdıng Qazaqstanda bıznes júrgizýge múddelilik tanytatyn saýd kompanııalary úshin senimdi seriktes bola alatynyn basa aıtty.
Qanat Sharlapaev Saýd-Qazaqstan ınvestıtsııalyq «dóńgelek ústeline» qatysýshylardy «Báıterek» holdıngi Saýd Arabııasy koroldigi men Qazaqstan arasyndaǵy saýda-ekonomıkalyq jáne ınvestıtsııalyq yntymaqtastyqty nyǵaıtý úshin bar kúsh-jigerin jumsaıtynyna sendirdi.