«Báıterek» pen «QazAgro» holdıngteri qaıta qurylady

ASTANA. QazAqparat - Qazaqstan Prezıdenti memlekettik holdıngter rólin qaıta qarastyrýdy tapsyrdy.

«Úkimetke «Samuryq-Qazyna» holdıngin sapaly túrde transformatsııalaý isin júzege asyrýdy tapsyramyn.

Basqarýshylyq jáne óndiristik bıznes úderisterin tolyq revızııa men  ońtaılandyrýdan ótkizý qajet. Nátıjesinde ol tıimdiligi joǵary, jınaqy jáne kásibı holdıngke aınalýǵa tıis. Menedjment pen korporatıvti basqarý sapasyn halyqaralyq deńgeıge jetkizý kerek.

Memleketke qandaı mańyzdy sektorlarda, qatysý úlesiniń qandaı mólsherimen jáne ne qaldyratynymyzdy naqty anyqtap alýymyz kerek», - dedi Elbasy.

Nursultan Nazarbaev atap ótkendeı, tabıǵı monopolııalardy jáne strategııalyq mańyzy bar,  sonyń ishinde Transulttyq kompanııalar qatysatyn jobalardy iske asyrý mindetin memleketke qaldyrý kerek. Bul jobalar mýltıplıkatıvti nátıje  berýge tıis.

Sonymen qatar Elbasy «Báıterek» jáne «QazAgro» holdıngterin de qaıta qurýdy júktedi.

«Olar memlekettik damý baǵdarlamalaryn iske asyrý jónindegi operatorlar bolýǵa tıis. Soǵan oraı olardyń fýnktsııalaryn ońtaılandyrý kerek. Jeke sektor júzege asyra alatyn nárseniń barlyǵy bızneske berilýi qajet.

Sondaı-aq, olarǵa baǵdarlamalardy iske asyrý úshin memlekettik emes qarjy kózderi arqyly qor qalyptastyrýmen aınalysý kerek», - dedi ol.