«Báıterek» holdıngi «Sberbank Qazaqstandy» satyp aldy

NUR-SULTAN. QazAqparat – «Báıterek» ulttyq basqarýshy holdıngi men «Sberbank» toby «Sberbank» AQ Qazaqstandaǵy enshiles banki aktsııalarynyń barlyq paketin satyp alý-satý mámilesin jasasýdy aıaqtady, dep habarlaıdy QazAqparat Holdıngtiń baspasóz qyzmetine silteme jasap.

Mámile ózara qolaıly qarjylyq sharttarmen jasaldy jáne barlyq qajetti retteýshilik maquldaýlardan ótti.

Bank óz klıentteri aldyndaǵy barlyq mindettemelerin oryndaýdy jalǵastyrady, burynǵy klıentteri úshin bank ónimderi boıynsha barlyq sharttar ózgerissiz qalady.

«Báıterek» holdıngi eldiń qarjy júıesi úshin banktiń mańyzy joǵary dep esepteıdi. «Sberbank Qazaqstannyń» zamanaýı ınfraqurylymy men tehnologııalary el ekonomıkasynyń naqty sektoryn qarjylandyrýdy jalǵastyrýǵa jáne qyzmetti tolyqqandy júrgizýge múmkindik beredi.

Mámile aıasynda bank belsendi operatsııalardy tolyq jańartýǵa, depozıtter tartýǵa jáne tólemder júrgizýge, sondaı-aq halyq pen bızneske arnalǵan ónimder men qyzmetterdi damytýǵa múmkindik alady. Jaqyn ýaqytta «Sberbank Qazaqstanǵa» rebrendıng júrgiziledi.

Sonymen qatar, «Báıterek» holdıngi banktiń úzdiksiz jumysyn qamtamasyz etýge jáne banktiń burynǵy, sondaı-aq jańa klıentterine arnalǵan bank qyzmetterin damytý jáne jetildirý úshin qolaıly jaǵdaı jasaýǵa umtylady.