«Báıterek» ǴZK-dan birinshi ushyrylym 2025 jyly júzege asyrylady

ASTANA. QazAqparat - «Báıterek» ǵarysh zymyran keshenin qurý jobasy «Baıqońyr» keshenin saqtap qalýǵa jáne tıimdi paıdalanýǵa múmkindik beredi. Parlament Májilisindegi Úkimet saǵatynda QR Qorǵanys jáne aeroǵarysh ónerkásibi mınıstri Beıbit Atamqulov osylaı málim etti, dep habarlaıdy QazAqparat.

Onyń sózine qaraǵanda, 2050 jylǵa deıingi «Baıqońyr» keshenindegi yntymaqtastyqtyń keleshegin pysyqtaý týraly Qazaqstan men Reseı prezıdentteriniń ýaǵdalastyqtaryna sáıkes, «Baıqońyr» kesheni boıynsha odan ári yntymaqtastyq Tujyrymdamasy ázirlenip, bekitildi. Osy oraıda keshen men qala ınfraqurylymynyń damýyn, ǵarysh jobalarynyń iske asyrylýy negizinde qolda bar keshen nysandaryn jáne birinshi kezekte «Báıterek» ǵarysh zymyran kesheni birlesken jobasyn qurý qarastyrylǵan.

Qol jetkizilgen ýaǵdalastyqtar turǵysynda «Báıterek» jobasy qazirgi qoldanystaǵy «Zenıt» ǵarysh zymyran keshenimen jáne orta deńgeıdegi perspektıvti reseılik tasymaldaǵysh zymyrandy iske asyrý negizinde josparlanýda. Bul rette «Zenıt» ǴZK nysandaryn Reseı Federatsııasynan jaldan shyǵarý, sondaı-aq olardy Qazaqstan tarapyna berý 2018 jyldyń 1 qańtarynan bastap júrgiziletin bolady.

«Osyǵan baılanysty bizge atalǵan nysandardy kútip-ustaý men paıdalaný  boıynsha jumystardy qarjylandyrý máselesin sheshý kerek. «Báıterek» jańa ǵarysh zymyran kesheninen birinshi ushyrylymdy 2025 jyly júzege asyrý josparlanyp otyr. «Báıterekti» qurý ǵarysh aılaǵynyń ekologııalyq problemalaryn sheshýde aıryqsha mańyzǵa ıe. Jańa zymyran geptıldi «Protondy» almastyrady»,-dedi mınıstr.

Onyń paıymynsha, bul Qazaqstannyń ulttyq múddeleri úshin strategııalyq mańyzy bar joba, sebebi «Baıqońyr» ǵarysh aılaǵynyń keleshegin saqtap qalýǵa jáne kommertsııalyq ushyrýlar elimizdiń álemdik naryqqa kirýine múmkindik beredi.