«Baısat» bazaryndaǵy órt 25 mınýtta oqshaýlandy

ALMATY. QazAqparat - Almaty qalasynyń tótenshe jaǵdaılar departamenti «Baısat» bazarynan shyqqan órtke qatysty qosymsha aqparatty jarııalady, dep habarlaıdy QazAqparat tilshisi.

Vedomstvoda málim etkendeı, órt sóndirýshiler saǵat 14:02-de joǵary dárejedegi shaqyrtý boıynsha Soltústik aınalma tas joly, 7, «Baısat» bazary mekenjaıyna shyqqan. Oqıǵa ornyna jetkende 150 sharshy metr aýmaqta eki qabatty konteınerlerdiń órtenip jatqany anyqtaldy.

«Dereý japsarlas qoıylǵan konteınerlerdi sóndirýge jáne salqyndatýǵa órt oqpandary engizildi, órt-avtotsısternalary obektiniń órt gıdranttaryna ornatylyp, magıstraldyq jeliler sozyldy, sýdyń úzdiksiz berilýi qamtamasyz etildi. Oqıǵa ornynda eki órt sóndirý ýchaskesi quryldy, gaz-tútinnen qorǵaý qyzmetiniń úsh býyny joǵary temperatýra men qatty tútin jaǵdaıynda jumys istedi», - dep habarlady TJD-da.

25 mınýt ishinde órtti oqshaýlaýǵa qol jetkizildi, saǵat 14:50-de órt tolyǵymen aýyzdyqtalyp, sóndirildi. Qabyldanǵan sharalarmen kórshi konteınerler men taýarlyq-materıaldyq qundylyqtary bar saýda qatarlary órtten aman qaldy. Zardap shekken adamdar bolǵan joq.

Eske salaıyq, Almatyda «Baısat» bazary aýmaǵynda ornalasqan konteınerlerdiń órtengeni týraly habarlaǵanbyz.

Aıta keteıik, jaqynda Almatyda «baraholka» bazary mańynda órt shyqqan bolatyn, sondaı-aq, «Barlyq» bazary aýmaǵynda ornalasqan fastfýd dúńgirshekteri de órtengen bolatyn.