Baıraǵy jerde taptalǵan el kórdim - áskerı jýrnalıst Nazgúl Kenjeteı
«Men 23 jastamyn. 2013 jyly mektepti bitirip, Túrkııanyń memlekettik grantyn jeńip aldym. Sol arqyly jýrnalıstıkany tańdadym. Qazir xalyqaralyq fotojýrnalıst ári analıtıkpin. Fotojobalarym, kóbinese, Eýropada jarııalanady. Otansyzdyqtyń júzi, bosqyndardyń axýaly, sábılerdiń kóz jasy - osynyń bárin sýretke túsirý arqyly álem jurtshylyǵyna jetkizgim keldi. Sóıtip, áskerı jýrnalıst atandym», - dedi N.Kenjetaı «100 jańa esim» jobasynyń ekinshi kezeńine arnalǵan saltanatty sharada.
Nazgúldiń fotolary shetelde jyldyń úzdik jobalary dep tanyldy. Alaıda, onyń negizgi maqsaty - otansyzdyqtyń ne ekenin kórsetý, beıbitshiliktiń qanshalyqty baǵaly ekenin jetkizý. Osy oraıda áskerı jýrnalıst Prezıdentke beıbitshilikti saqtaý jolyndaǵy eńbegi úshin alǵys bildirdi.
«Ózderińiz jaqsy bilesizder, álemde saıası, dıplomatııalyq, strategııalyq jáne taǵy basqa sebepterge baılanysty kóptegen qaqtyǵystar oryn alyp jatyr. Sol qaqtyǵystardyń biri - Taıaý Shyǵystaǵy Sırııa. 2014 jyldan beri stýdenttik kezden bastap osy máselelerdi jaqynyraq zertteýdi qolǵa aldym. Adamzattyń basyna kelgen bul problemany zertteý arqyly teńizde bir tamshy bolsam da, álemge, adamzatqa kómegim tıse eken deımin. Men emes, mamandyǵym meni tańdady. Osylaısha, jas maman úshin jaýapkershiligi óte aýyr jolǵa shyqtym. Osy jolda «Jánatta azyq kóp pe?» dep suraǵan sábıdi kórdim... Ózendeı aǵyp, joq bolyp ketken bir memleket kórdim. Bosyp ketken xalyqty kórdim. Baıraǵy jerde taptalǵan el kórdim jáne sol baıraǵyn qorǵaı almaǵan er kórdim. Osynyń bárin kórdim de, qolymnan kelgenshe álemge kórsetýge tyrystym. Maqsatym otansyzdyqtyń ne ekenin kórsetý edi. Qurmetti Nursultan Ábishuly, men otansyzdyqtyń ne ekenin óz kózimmen kórgen jan retinde sizdiń beıbitshilik jolyndaǵy eńbegińizdiń ońaıshylyqpen kelmegenin uqtym. Ózimniń «Otansyzdyqtyń júzi» atty jobam arqyly barsha otandastarymdy qolda bar altynnyń qadirin bilýge shaqyramyn», - dep atap kórsetti N.Kenjetaı.
Aıta keteıik, «100 jańa esim» tizimine 29 jastaǵy Erjan Sálimgereev te endi. Ol úshinshi synypta oqyp júrgende transformatordyń ishine kirip, toqqa túsip qalǵan. Sol kezde bir qol jáne bir aıaǵynan aıyryldy. Biraq qıynshylyqqa moıymaı, xalyqaralyq dárejedegi sport sheberi, álem kýbogynyń tórt dúrkin ıegeri, Azııa oıyndarynyń eki márte jeńimpazy dárejesine deıin jetti.
Búgingi sharaǵa 11-synypty bitirgenshe 10 mektepti aýystyrǵan kásipker de qatysty. Larıon Lıannyń joǵary bilimi bolmasa da, ol óz komandasyn jasaqtap, iri banktiń tapsyrysyn aldy. Holdıngtiń basshysy atandy.