Baımyrza Qojamberlıev: Rýhanı qajettilik - barlyǵynan joǵary
«Sebebi, Prezıdenttiń ózi aıtqandaı, shyn máninde «ýaqyt pen keńistiktiń kókjıegi toǵysqan jerde ult tarıhy bastalady». Iá, táýelsizdik jyldary elimizde kóp jumys atqaryldy. Memlekettik «Mádenı mura» baǵdarlamasy aıasynda atqarylǵan jumystardy tabysty deýge bolady. Alaıda, Prezıdenttiń atap ótkenindeı, babalarymyzdyń ómiri men olardyń ǵajap órkenıeti jóninde kóptegen derekter áli ǵylymı aınalymǵa túsken joq. Bul álbette, ǵalymdardy jańa izdenisterge ıtermeleıdi.
Shyndyǵynda, álemniń ár túkpirine taraǵan túrki tektes taıpalar men halyqtar basqa elder men óńirlerdiń tarıh úderisterine eleýli úles qosty. Osyǵan baılanysty Prezıdent «Túrki órkenıetteri: túp tamyrynan qazirgi zamanǵa deıin» atty jobany qolǵa alý qajettigin aıtady. Osy joba aıasynda 2019 jyly Astanada túrkologtardyń dúnıejúzilik kongresin jáne ártúrli elder mýzeıleriniń ekspozıtsııalaryna ejelgi túrki jádigerleri qoıylatyn túrki halyqtarynyń mádenı kúnderin uıymdastyrý kerektigin atap kórsetedi», - dedi B. Qojamberlıev.
Onyń aıtýynsha, Qazaqstan búginde kúrdeli álemniń qıyn soqpaqtarymen júrip keledi. Biraz synnan múdirmeı óttik. Buǵan ýaqyt tóreshi. Álemdik kóptegen synaqtar aldaǵy ýaqytta da aldymyzdan shyǵatynyna kúmán keltirýge bolmaıdy.
«Biraq barlyq elder men halyq qandaı qıyn kezeń bolmasyn óziniń rýhanı qajettiligin ekinshi qatarǵa ysyryp tastamaǵan. Buǵan tarıh dálel bola alady. Osy turǵydan kelgende Elbasynyń maqalasy Qazaqstannyń jańa damý kezeńinde bizdiń barlyǵymyzǵa jańa mindetter júkteıdi», - dedi B. Qojamberlıev.
Aıta keteıik, QazAqparat maqalanyń tolyq mátinin jarııalaǵan bolatyn.