Baılyǵymyzdy emes, aqyl oıdy ınvestıtsııalaıtyn ýaqyt keldi – Dáýren Qýat
Sarapshy Ulttyq keńestiń úshinshi jıynynda el erteńine tikeleı yqpal etetin bilim salasyna qatysty qandaı oılar aıtylǵanyn taratyp berdi.
«Búgingi otyrysta «Nege biz muǵalimderdi osy zamannyń tulǵasyna aınaldyrmaımyz?» degen másele kóterildi. Ánshi nemese sportshy emes, muǵalimniń mártebesi qaı qoǵamda bolmasyn bıik bolýy kerek. Balalar osy mamandyqqa qyzyǵyp, eliktep ósýi tıis. Mektepke degen qurmet qalyptasýy kerek. Bizdiń qoǵamda qaltasynda aqshasy bar emes, bilimdi adam mártebeli bolýy kerek. Keńes múshesi Raýan Kenjehanuly 2-3 aýysymmen oqıtyn mektepter jaıly usynys jasady. Onyń aıtýynsha, kóp aýysymmen oqıtyn mektepte durys bilim bolmaıdy. Muǵalim de temirden emes, ol da sharshaıdy. Synyptaǵy 40 bala – 40 másele degen sóz. Al qarap tursańyz, úsh aýysymdy mektepte oqyp jatqan ózimizdiń qazaqtyń balalary. Muny biz ózimizdiń oqýshylarymyzdyń tamyryna balta shaýyp jatqanymyz dep túsinýimiz kerek. Ekinshiden, Qazaqstanda bilim týraly telearna ashý týraly usynys jetkizildi. Karantın ýaqytynda birneshe aı «Balapan» arnasynan muǵalimder sabaq berdi. Bul bizge arnaıy bilim týraly telearna qajettigin kórsetti. Mekteptegi sabaq berý metodıkasyn arna arqyly nasıhattaý kerek. Muǵalimder arasynda tájirıbe, metodıka, bilim berý, túsindirý, qyzyqtyrý degen sııaqty ózara tájirıbe almasatyn ortaq arnasy bolýy kerek», - dedi Dáýren Qýat.
Sonymen qatar spıker Ulttyq keńes otyrysynda sheteldik qazaqtardyń balalaryn Qazaqstanda oqytý máselesi aıtylǵanyn tilge tıek etti.
«Sheteldegi baýyrlarymyzdy, aǵaıyndarymyzdy ákelip oqytý máselesin Asylbek Qojahmetov kóterdi. Olar 4-5 jyl Qazaqstanda turǵannan keıin azamattyq alady. Osylaısha demografııalyq másele sheshimin tabary sózsiz. Sondaı-aq, sheteldegi qandastarymyzdyń máselesi, mıgratsııalyq protsess máselesi oń sheshimin tabar edi. Memleket basshysy bul usynystarǵa qatysty keremet oılar aıtty. Ásirese, ǵylym salasynda ter tógip júrgen adamdardyń áleýmettik turmystyq deńgeıin kóterý týraly oılary árqaısymyzdyń kóńilimizden shyqty», - dedi ol.
Onyń aıtýynsha, ǵalym ǵylymı jumystan basqa nárselerge bas aýyrtpaýy kerek.
«Ǵalymdar – aqyl oı ınvestory. Olar ózderiniń bilimin ınvestıtsııalaıdy. Ǵylymı tehnıkalyq progress bolyp jatqan zamanda nege biz baılyǵymyzdy satyp kún kórýimiz kerek? Nege biz basqa elder sııaqty bilimimizdi ıgiligimizge aınaldyrmaımyz? Adamı kapıtaldy, aqyl-oıdy paıdalanbaımyz? Mine, osy ózekti máseleler búgin aıtyldy», - dedi Dáýren Qýat.
Últtyq qoǵamdyq senim keńesiniń múshesi osy ýaqytqa deıin keńes tarapynan aıtylǵan usynystardyń kópshiliginiń júzege asqanyn jetkizdi.
«Ulttyq qoǵamdyq senim keńesi músheleriniń aıtqan usynys, jobalary júzege asyp keledi. Sonyń biri — bos jatqan jerlerdi memleket menshigine qaıtarý týraly Muhtar Taıjannyń usynysy oryndaldy. Saıası partııalar men saılaý týraly zańǵa ózgeris engizý usynysy qabyldandy. Keńes múshesi Aýyt Muqıbektiń halyqty eńbekpen qamtý jáne kóshi qon máselesi boıynsha 7 usynysy da qabyldandy», - dedi ol.
Aıta keteıik, QR Prezıdenti Qasym-Jomart Toqaevtyń tóraǵalyǵymen Ulttyq qoǵamdyq senim keńesiniń úshinshi otyrysy ótti. Kezekti otyrys adamı kapıtaldy damytýǵa, atap aıtqanda, bilim berý, densaýlyq saqtaý máselelerine arnalǵan.
Foto: dalanews.kz