Baılanys salasyndaǵy beldi sheneýnik áıeliniń atyndaǵy JShS-ǵa qamqorlyq jasap kelgen

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń aımaqaralyq baılanys ınspektsııasy basshysynyń mindetin atqarýshy sybaılas jemqorlyq qylmysyn jasady degen kúdikke ilindi, dep habarlaıdy QR Sybaılas jemqorlyqqa qarsy is-qımyl agenttiginiń baspasóz qyzmeti.

Atyraý oblystyq sybaılas jemqorlyqqa qarsy qyzmeti «QR Tsıfrlyq damý, ınnovatsııalar jáne aeroǵarysh ónerkásibi mınıstrligi Telekommýnıkatsııalar komıtetiniń Aqtóbe, Batys Qazaqstan, Mańǵystaý, Atyraý oblystary boıynsha aımaqaralyq baılanys ınspektsııasy» basshysynyń mindetin atqarýshyǵa qatysty kásipkerlik qyzmetke zańsyz qatysqan degen kúdikpen sotqa deıingi tergeý bastaldy.

Málimetke saı, ol memlekettik fýnktsııalardy oryndaýǵa ýákiletti tulǵa bola otyryp, belgilengen tyıymǵa qaramastan, jubaıynyń atyna tirkelgen baılanys salasynda kásipkerlik qyzmetti júzege asyratyn «Ǵasyr Qazsvıaz» JShS-in basqarýǵa qatysyp, osy JShS-ǵa artyqshylyqtar men qamqorlyq kórsetken.

Kúdikti óziniń kinásin moıyndaýyna jáne kúdikti men onyń qorǵaýshysy protsessýaldyq kelisim jasasý týraly ótinish bergenine baılanysty kúdiktige qatysty protsessýaldyq ustaý sharasy qoldanylmady.

Kúdiktige qatysty túpkilikti sheshimdi onyń kinásiniń deńgeıin anyqtaý arqyly sot qabyldaıtyn bolady.