Baılanys operatorlaryna sapasyz qyzmeti úshin salynatyn aıyppul kólemi 10 ese artty

NUR-SULTAN. QazAqparat – Baılanys operatorlaryna sapasyz qyzmeti úshin salynatyn aıyppul kólemi 100 AEK-den 1000 AEK-ge artty, dep habarlaıdy QazAqparat Tsıfrlyq damý, ınnovatsııalar jáne aeroǵarysh ónerkásibi mınıstrliginiń baspasóz qyzmetine silteme jasap.

«Prezıdent baılanys salasyndaǵy tutynýshylardyń quqyqtaryn qorǵaýdy kúsheıtýdi, ınternettiń naqty parametrleriniń operatorlar málimdegen parametrlerden aıtarlyqtaı alshaqtyǵy úshin jaýapkershilikti engizýdi jáne qatańdatýdy tapsyrǵan bolatyn. Atalǵan tapsyrmany iske asyrý úshin mınıstrlik depýtattyq korpýspen birlesip, operatorlardyń standarttarǵa, tehnıkalyq normalar men sapa kórsetkishterine sáıkes kelmeıtin baılanys qyzmetterin kórsetkeni úshin jaýapkershiligin kúsheıtýge baǵyttalǵan sharalardy ázirledi. Endi zań buzýshylyqtar anyqtalǵan jaǵdaıda baılanys operatorlaryna 100 AEK ornyna 1000 AEK aıyppul salynady, al bir jyl ishinde qaıtalap buzǵan jaǵdaıda aıyppul somasy 200-den 1500 AEK-ke deıin bolady», - delingen baspasóz málimdemesinde.

Tsıfrlyq damý, ınnovatsııalar jáne aeroǵarysh ónerkásibi mınıstrligi júrgizgen taldaý kórsetkendeı, baılanys sapasynyń nasharlyǵyna shaǵymdar sany 10 ese ósken. 2021 jyldyń qorytyndysy boıynsha mınıstrlik 562 tekserý júrgizdi (2020 jyly 51 tekserý, al 2019 jyly 93 tekserý júrgizildi).

«Operatorǵa qatysty baılanystyń nemese ınternettiń nashar sapasyna tekserý júrgizý úshin qazaqstandyqtar resmı ótinishti Telekommýnıkatsııalar komıtetiniń (TsDIAÓM) ne oblystaǵy aýmaqtyq baılanys ınspektsııasynyń mekenjaıyna «elektrondyq úkimet» portaly, «E-Otinish» júıesi arqyly ne qaǵaz túrinde joldaýlary qajet. Ótinishte shaǵymnyń mánin, baılanys operatorynyń ataýyn jáne tekserý júrgizý qajet ótinish berýshiniń naqty mekenjaıyn kórsetý mindetti. Ótinishti alǵannan keıin prokýratýra organdarynda tekserýdi taǵaıyndaý týraly akt tirkeledi. Tekserý barysynda kórsetiletin baılanys qyzmetteriniń sapasy boıynsha ólsheýler júrgiziledi», - dep naqtylaıdy vedomstonyń baspasóz qyzmetinen.

Operatorǵa qatysty zań buzýshylyqtar anyqtalǵan jaǵdaıda Ákimshilik quqyq buzýshylyq týraly kodekstiń 637-babyna sáıkes jaýapkershilik kózdelgen.

Aıta ketsek, keshe Memleket basshysy «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.