Baılanys operatorlaryna salynatyn aıyppul 10 ese artty - Baǵdat Mýsın
«Prezıdent Qasym-Jomart Kemeluly Joldaýynda «eń aldymen tsıfrlyq teńsizdikti joıý, barlyq azamattar úshin ınternetke barynsha qoljetimdilikti jáne sapaly baılanysty qamtamasyz etý» kerektigin tapsyrǵan bolatyn. Búgingi tańda baılanys pen ınternet - bul joldar men elektr energııasy sııaqty aýadaı qajet dúnıe. Bizdiń keń baıtaq jerimizdiń kólemin eskere otyryp, kommýnıkatsııamen qamtý baǵytynda aýqymdy jumystar atqardyq. Endigi bizdiń maqsatymyz - ınternet men baılanys sapasyn júıeli túrde jaqsartý», - dep
Baǵdat Mýsın baılanys operatorlaryna ózderi kelisken talapqa sáıkes ınternet jyldamdyǵyn qamtamasyz etpegeni jáne nashar baılanys úshin aıyppul kólemin ulǵaıtýǵa qatysty máseleni birneshe ret kótergenin, bul bastamany depýtattar qoldap, zańnamalyq deńgeıde bekitkenin atap ótedi.
«Endi sapasyz qyzmet kórsetken baılanys operatorlaryna salynatyn aıyppul 10 esege artty. Eger buryn aıyppul 100 AEK bolsa, endi onyń kólemi - 1000 AEK. Al bir jyl ishinde qaıtalap buzǵan jaǵdaıda aıyppul somasy 200-den 1500 AEK-ke deıin ósedi», - dedi ol.
Sonymen qatar mınıstr sapasyz qyzmetti qalaı anyqtý kerektigine detoqtalady.
«Árbir qazaqstandyq baılanystyń nemese ınternettiń nashar sapasyna tekserý júrgizý úshin shaǵymynyń taqyrybyn, operatordy jáne tekserýdi qajet etetin mekenjaıdy kórsete otyryp Telekommýnıkatsııalar komıtetiniń nemese tıisti aýmaqtyq baılanys ınspektsııasynyń mekenjaıyna «elektrondyq úkimet» portaly, «E-Otinish» júıesi arqyly júgine alady. Ótinish qabyldanǵan keıin tekserý taǵaıyndalady jáne onda olqylyqtar anyqtalsa, operatorǵa aıyppul salynyp, sondaı-aq buzýshylyqtardy joıý týraly nusqama beriledi. Mundaı qadam bizge sapasyz baılanysy bar aımaqtardy anyqtaýǵa jáne jedel sheshim qabyldaýǵa, al operatorlarǵa baılanys sapasyn jaqsartýǵa jáne óz jelilerin damytýdy durys josparlaýǵa múmkindik beredi», - dedi Baǵdat Mýsın.