Baıqońyrdyń myńdaǵan turǵyny tegin medıtsınalyq qyzmet ala almaı júr - senator
Depýtattyń aıtýynsha, elimizdiń azamattary Reseı zańnamasynyń erejeleri boıynsha, onyń ishinde 1996 jylǵy úkimetaralyq kelisimge sáıkes zeınetaqy alady. Al, qazir bul adamdar mindetti áleýmettik medıtsınalyq saqtandyrý aıasynda tegin medıtsınalyq kómek ala almaı júr. Sebebi, olar týraly derekter elimizdiń Eńbek mınıstrligi aqparattyq bazasynda joq.
«Qazaqstan Respýblıkasynyń osy sanattaǵy azamattary medıtsınalyq kómekti tek qazaqstandyq medıtsınalyq uıymda tegin medıtsınalyq kómektiń kepildik berilgen kólemi aıasynda jáne Reseı Federatsııasy uıymynda shuǵyl kómek ala alady. 2022 jyly 2 myńnan astam naýqas konsýltatsııalyq-dıagnostıkalyq kómek, 600-ge jýyq naýqas josparly statsıonarlyq kómek, onyń ishinde koronarografııalyq jáne oftalmohırýrgııa kómegin almaǵan», - dedi Aqmaral Álnazarova.
2016 jyldan bastap qalada Baıqońyr qalasynyń, sondaı-aq Tóretam jáne Aqaı aýyldarynyń turǵyndary tirkelgen qazaqstandyq aýrýhana jumys isteıdi. Alaıda, bul aýrýhana qajetti kólemde tegin medıtsınalyq qyzmetterdi Qazaqstannyń saqtandyrylǵan azamattaryna ǵana kórsetedi.
«Bul turǵyda zeınetkerler tegin medıtsınalyq kómek alý quqyǵynan aıryldy. Qart adamdarǵa qatysty memlekettik saıasattyń negizgi erejelerin jáne atalǵan problemanyń erekshe áleýmettik mańyzdylyǵyn eskere otyryp, osy azamattardy elimizdiń aqparat júıesine engizý, tıisti qarjylandyrý máselesin sheshýdi jáne memlekettik jarna tóleıtin adamdardyń jeńildetilgen sanatynda bolýyn qamtamasyz etýin qarastyrýdy suraımyz», - dedi Aqmaral Álnazarova.