Baıqońyrdyń biraz jeri Qazaqstanǵa qaıtarylǵanymen, jalǵa berý quny ózgermeıdi

ASTANA. QazAqparat - Baıqońyrdyń biraz jeri Qazaqstanǵa qaıtarylǵanymen jalǵa berý quny ózgerissiz qalady. Bul týraly búgin Úkimettiń selektorlyq rejimdegi otyrysynan keıin BAQ ókilderiniń saýalyna jaýap bergen Qorǵanys jáne aeroǵarysh ónerkásibi mınıstri Beıbit Atamqulov aıtty, dep habarlaıdy QazAqparat.

«Bul 11,5 myń gektar jer. Ózderińiz bilesizder, Tóretam stansasy men Aqaı eldi mekeni bar. Solardyń tóńiregindegi jerlerdi qaıtaryp jatyrmyz. Sebebi eki eldi mekenniń halyq sany ósip, qurylys jumystary da artyp keledi.  Sondyqtan halyqqa jer kerek. Biz Qyzylorda oblysy ákimshiligimen birlesip, jalǵa berilgen atalǵan jerdi qaıtaryp jatyrmyz. Ol Syrdyń, temirjoldyń boıynda jatqan jerler», - dedi Beıbit Atamqulov.

Onyń aıtýynsha, atalǵan jerler esh ýaqytta tehnıkalyq óńdeýden ótpegen. Jalpy, Baıqońyr tóńiregindegi jerlerdiń barlyǵy da ekologııalyq turǵyda taza.

«Kelisilgen shartqa sáıkes jaldyń somasy tómendemeıdi. Máselen, 42, 43 jáne 45-inshi alańdar da Qazaqstanǵa ótedi. Biraq, jaldaý quny ózgerissiz qalady - 115 mıllıon dollar», - dedi mınıstr.

Aıta keterligi, Chelıabınskide ótken Qazaqstan men Reseıdiń XIV óńiraralyq yntymaqtastyǵy forýmy aıasynda «Baıqońyr» keshenin Jalǵa berý shartyna ózgerister engizý týraly Hattamaǵa qol qoıyldy. Qujatqa sáıkes, Baıqońyrǵa jaqyn ornalasqan Aqaı jáne Tóretam aýyldaryndaǵy 11,6 myń gektar jer Reseıge jalǵa berý aýmaǵynan shyǵarylyp, Qyzylorda oblysyna qaıtarylady.