Baıqońyrdy jalǵa berýden Qazaqstan qansha aqsha tapty

ASTANA. QazAqparat - «Baıqońyr» kesheni jalǵa berilgeli Qazaqstan bıýdjetiniń kiris bóligine 2,645 mıllıard AQSh dollary tústi. Bul týraly QR Premer-Mınıstriniń «Halyq kommýnısteri» fraktsııasynyń depýtattyq saýalyna bergen jaýabynda aıtyldy, dep habarlaıdy «QazAqparat» HAA tilshisi. 

Saýalda depýtattar Aqaı men Tóretam qalalarynyń damý keleshegine, sonymen qatar qazaqstandyq jáne reseılik azamattardyń eńbekaqy sharttarynyń teńquqyqtylyǵyna alańdaýshylyq bildirdi.

Aqaı men Tóretam qalalarynyń damýyna qatysty Premer-Mınıstr atalmysh shaharlarda áleýmettik nysandar men joldar, sý júıeleri jóndelip, jańadan salynatynyn habarlady.

Sonymen qatar, Qarmaqshy aýdanynda «Baıqońyr» oıyn-saýyq, týrıstik aýmaǵyn qurý boıynsha jobany júzege asyrý kózdelgen. Bul joba keleshekte myńdaǵan jańa jumys ornyn ashady dep kútilýde.

Úkimet basshysy teńquqyqty eńbek sharttary týraly jaýap bere kele, Baıqońyrdyń 1995 jylǵy mártebesi týraly kelisimdi eske saldy. Oǵan sáıkes, qala turǵyndaryn saıası nanymyna, násil men ultyna, áleýmettik shyǵý tegi, jynysy, áleýmettik jáne múliktik hal-jaǵdaıyna, tili men dinine qatysty shekteý qoıýǵa jol berilmeıdi. 

Al eki eldiń 2004 jylǵy bekitilgen kelisimi boıynsha, qazaqstandyq jáne reseılik mamandar, uıymdar «Baıqońyr» aılaǵyndaǵy birlesken jobalardy júzege asyrýda teń sharttar negizinde qatysady. Buǵan qosa reseılik tarappen qarjylandyrylatyn mekemelerde eńbek etetin Baıqońyr qalasynyń turǵyny azamattyǵyna qaramastan Reseıdiń zańnamasyna sáıkes aılyq alady.

Qazaqstan azamattary jiberilmeıtin, Reseıdiń memlekettik qupııalarymen baılanysty jumys túrlerinde ǵana ózgeshelik bar.

«Qazaqstan azamattarynyń «Baıqońyr» kesheninde eńbek quqyqtaryna shekteý qoıý jaǵdaıy baıqalmaıdy (...) Sonymen birge, «Baıqońyr» kesheninde múddelerdiń zańdylyǵy men quqyǵyn qorǵaý úshin sol qalada turatyn Qazaqstan azamattarynyń ótinimderimen aınalysatyn QR Prezıdentiniń arnaıy ókili jumys isteıdi», - delingen jaýapta.