Baıqońyrdan «Soıýz MS-09» ǵarysh kemesi ushyryldy

BAIQOŃYR. QazAqparat - Baıqońyr ǵarysh aılaǵynan «Soıýz MS-09» kóliktik basqarylatyn ǵarysh kemesi sátti ushyryldy, dep habarlaıdy «QazAqparat» HAA tilshisi.

«Soıýz MS-09» ǵarysh kemesi 2018 jylǵy 6 maýsym kúni 17 saǵat 12 mınýtta ǵarysh aılaǵynyń №1 Gagarın alańynan ushyryldy. Ol Halyqaralyq ǵarysh stansysyna 56/57 ekıpajyn jetkizedi.

Ǵarysh kemesin Baıqońyr ǵarysh aılaǵynan ushyrý shtattyq rejimde ótti.

Halyqaralyq ekıpaj: keme komandıri, reseılik kosmonavt Sergeı Prokopev, bort ınjenerleri- nemis astronavty Aleksandr Gerst jáne amerıkalyq astronavt Serena Aýnon-Chensellordan quralǵan.

Olardyń aldynda aýqymdy zertteýler baǵdarlamasy tur, atap aıtqanda, ashyq ǵaryshqa shyǵý, júk kemelerimen jumys isteý, HǴS bort júıelerine qyzmet kórsetý sııaqty mıssııalardy atqarady. Sondaı-aq reseılik ǵaryshkerler fýtboldan Álem chempıonatynyń fınaly ótetin kúni stansynyń bortynda fýtbol oınaýdy josparlap otyr.  

Josparǵa sáıkes, «Soıýz MS-09» ǵarysh kemesi Halyqaralyq ǵarysh stansysymen 2018 jylǵy 8 maýsym kúni túıisedi.