Baıqońyrdan «Proton» zymyran tasyǵyshyn ushyrýdy 2025 jyly toqtatý josparlanýda
«Biz «Proton» zymyrandarynyń ushý kólemin kemitý boıynsha qyrýar ister atqaryp jatyrmyz. Bizdiń qolymyzda «Proton» zymyran tasyǵyshynyń ushyrylymdaryn kezeń-kezeńimen azaıtý jóninde qol qoıylǵan qujat bar. Túptep kelgende, bul zymyrandy ushyrýdy 2025 jyly toqtatý josparlanýda. Biz bul máselege úlken mańyz berip otyrmyz», - dep jaýap berdi ol depýtattyń kıikterdiń qyrylýyna geptıldiń áseri jaıynda bolǵan suraǵyna.
Onyń aıtýynsha, «Protondy» ushyrýdy qazir toqtatý múmkin emes.
«Onda reseılikter úshin «Báıterek» ǵarysh kesheni tipti kereksiz bolady, olar múldem ketip qalady. Sebebi qazirgi ýaqytta «Proton» jerserikterin jáne túrli ǵarysh apparattaryn ǵaryshqa shyǵaratyn álemniń eń tıimdi zymyran tasyǵyshy bolyp otyr. Reseıdiń álemde ushyrylym boıynsha kóshbasshy bolýynyń basty syry da osynda», - dedi T.Musabaev.
Komıtet basshysy atap ótkendeı, Qazaqstan men Reseı 11 jyl buryn «Baıqońyrdy» geptılmen jáne amılmen jumys isteıtin zymyran tasyǵyshtardan bosatý týraly kelisimge qol qoıǵan.
«Qazaqstan men Reseı arasynda 2004 jyly qol qoıylǵan «Baıqońyr» ǵarysh aılaǵynda «Báıterek» ǵarysh keshenin qurý jónindegi bastamany sońyna deıin jetkizý isi - eń basty máselelerdiń biri», - deıdi T. Musabaev. «Ol «Baıqońyr» aılaǵyn geptıl men amıl otynyn paıdalanatyn zymyran tasyǵyshtardan bosatýdy kózdeıdi. Bul hımııalyq zattar adamnyń densaýlyǵy úshin, jalpy elimizdiń ekologııasy úshin óte qaýipti. 2004 jyly 9 qańtarda Qazaqstan Prezıdenti N.Nazarbaev pen Reseı Prezıdenti arasynda «Protonnan» tolyqtaı bas tartýǵa múmkindik beretin «Báıterek» ǵarysh keshenin qurý týraly kelisimge qol qoıylǵan bolatyn».