Baıqońyrdan «Progress MS-08» júk kemesi alǵash ret jańa úlgimen ushyrylmaq

BAIQOŃYR. QazAqparat - Baıqońyr ǵarysh aılaǵynda Halyqaralyq ǵarysh stantsııasyna attanatyn (HǴS) «Progress MS-08» kóliktik júk kemesiniń (KJK) ushyrylymyna daıyndyq jumystary aıaqtalýda, dep habarlaıdy «QazAqparat» HAA tilshisi.

«Progress MS-08» kóliktik júk kemesi bar «Soıýz-2.1a» zymyran-tasyǵyshynyń  ushyrylymy  2018 jyldyń 11 aqpany Astana ýaqytymen 14 saǵat 58 mınýt 45 sekýndqa josparlanǵan.

KJK-ny zymyran-tasyǵyshtyń 3-shi satysynan bólip, kemeni belgilengen orbıtaǵa shyǵarý ushyrylymnan keıin toǵyzynsha mınýtta júrgiziletini kútilýde.

«Progress MS-08» kóliktik kemesin HǴS-ǵa jaqyndatý jáne túıistirý jumystaryn Ushýdy basqarý ortalyǵynyń mamandary men reseılik ushqyshtar -  Aleksandr Mıshýrkın men Anton Shkaplerovtyń baqylaýymen avtomatty rejimde júrgizý josparlanýda.

Ádette «Progresster» HǴS-qa eki táýliktiń ishinde barady, alaıda bul joly alǵash ret ǵarysh kemesi jańa úlgi boıynsha ushyrylmaq. Aldyn ala esep boıynsha, keme stantsııaǵa 3 saǵat 27 mınýtta jetýi tıis.

«Progress MS-08» kemesi Halyqaralyq ǵarysh stantsııasyna eki tonnadan astam júkti, sonyń ishinde otyn, aýa, stantsııany jumys jaǵdaıynda ustap turýǵa arnalǵan jabdyqtar, ekıpaj múshelerine qajetti zattardy jetkizedi.