Baıqońyrdan OneWeb spýtnıkter toby ushyryldy

NUR-SULTAN. QazAqparat –Búgin Nur-Sultan ýaqytymen tańǵy saǵat 04:13-te Baıqońyr ǵarysh aılaǵy 31-shi alańynyń «Vostok» ushyrý kesheninen Fregat» údemeli blogy jáne OneWeb brıtandyq 34 ǵarysh apparaty bar «Soıýz-2.1b» zymyran-tasyǵyshy ushyryldy, dep habarlaıdy QazAqparat tilshisi.

Buǵan deıin zymyran-tasyǵyshty ushyrý tehnıkalyq sebepterge baılanysty eki ret keıinge shegerilgen bolatyn. Al búgingi ushyrý sáti Roskosmostyń telestýdııasynan tikeleı efır arqyly kórsetildi. Tikeleı reportajdy júrgizýshilerdiń aqparatyna sáıkes, zymyran shtattyq rejımde ushyryldy. «Soıýz 2.1 b» zymyran-tasyǵysh satysynyń bólinýi ushý tsıklgrammasyna sáıkes boldy. Zymyran ushyrylǵannan keıin 10 mınýttan soń spýtnıkter toptasy bar basty blok orbıtaǵa shyqty.

OneWeb tómenorbıtaldy ǵarysh apparattary jer betindegi tutynýshylardy tikeleı spýtnık baılanysy arqyly jyldamdyǵy joǵary ınternetpen qamtamasyz etýge arnalǵan. Búginge deıin orbıtaǵa 254 ǵarysh apparaty shyǵarylǵan bolatyn. Endi taǵy 34 spýtnıktiń shyǵarylýymen olardyń sany 288-ge jetedi. Kompanııa jalpy sany 500-den astam spýtnıkti Jer aınalasyndaǵy orbıtaǵa shyǵaryp, olardy kommertsııalyq maqsatta paıdalanýdy kózdep otyr.

Sara Qabıqyzy