Baıqońyrdan «Elektro-L» meteorologııalyq spýtnıgi ushyryldy

BAIQOŃYR. QazAqparat – Búgin, 5 aqpanda Astana ýaqytymen 15 saǵat 12 mınýtta DM-03 údetkish blogi jáne «Elektro-L» spýtnıgi bar «Proton-M» zymyran tasyǵyshy ushyryldy, dep habarlaıdy QazAqparat tilshisi.

Bıylǵy alǵashqy ushyrylymnyń tikeleı translıatsııasy Roskosmos áleýmettik jelilerinde kórsetildi. Aılaqtyń 81-alańynan «Proton-M» ushyrylymy shtattyq rejımde ótti. Baıqońyrda kún bultty boldy. Alaıda, 20 tonnadan astam júkti orbıtaǵa jetkizýge qaýqarly eń qýatty zymyrannyń ushyrylý sáti – qyzyqty kórinis.

Tsıklogrammaǵa sáıkes, zymyran-tasyǵyshtyń birinshi satysy ushýdan keıin eki mınýt ótken soń, ekinshi basqyshy úsh mınýttan keıin ajyrady, onynshy mınýtta DM údetkish blogi spýtnıkpen birge bólindi.

Alty jarym saǵat ishinde údetkish bloktyń úsh qosylymy bolýy kerek, sonyń arqasynda «Elektro-L» spýtnıgi orbıtaǵa shyǵady.

S. Lavochkın atyndaǵy ÚEU jasaǵan «Elektro-L» gıdrometeorologııalyq spýtnıgi – osy reseılik ǵarysh apparattary tobyndaǵy tórtinshisi. Spýtnıktiń salmaǵy – 2,1 tonna, orbıtanyń bıiktigi – shamamen 36 myń shaqyrym.