Baıqońyrdan bıylǵy jylǵy alǵashqy ushyrylym jasalady

BAIQOŃYR. QazAqparat – 5 aqpanda Baıqońyr ǵarysh aılaǵynan osy jyldaǵy alǵashqy ushyrylym jasalady, dep habarlaıdy QazAqparat menshikti tilshisi.

DM-03 údetkish blogy jáne «Elektro-L» spýtnıgi bar «Proton-M» zymyran tasyǵyshy 5 aqpan kúni Astana ýaqytymen saǵat 15.12-de ushyrylady.
Búgin, 2 aqpanda «Elektro-L» spýtnıgi bar «Proton-M» zymyran tasyǵyshy montajdaý-synaq korpýsynan shyǵaryldy jáne temirjol relsteri arqyly ǵarysh aılaǵynyń 81-shi alańynyń ushyrý keshenine jetkizildi.
Kúni boıy zymyrandy vertıkaldy kúıge keltirý júrgiziledi. Sodan keıin Roskosmos kásiporyndarynyń mamandary tehnıkalyq jabdyqty tekserýge jáne testileýge kirisedi.
«Elektro-L» serııaly reseılik ǵarysh apparattary aýa raıynyń boljamdaryn zertteýge, avıatsııalardy ushyrý jaǵdaıyna analız jasaýǵa, sondaı-aq teńizder men muhıttar akvatorııalaryn, tótenshe jaǵdaılar ahýalyn monıtorıngileýge arnalǵan.
Roskosmos baspasóz qyzmetiniń málimetinshe, qazir jer orbıtasynda 2011 jyldan beri jumys istep kele jatqan «Elektro» ǵarysh júıesiniń tobynda eki spýtnık — №2 «Elektro-L» jáne №3 «Elektro-L» paıdalanylyp jatyr.

Foto: Roskosmos