Baıqońyrdaǵy reseılik mektepterge qazaq tili men ádebıeti, Qazaqstan tarıhy pánderin engizý josparlanýda

BAIQOŃYR. QazAqparat – Qyzylorda oblysynyń ákimi Nurlybek Nálibaev Baıqońyr qalasyna jumys sapary aıasynda QR Prezıdentiniń «Baıqońyr» keshenindegi jańadan taǵaıyndalǵan arnaıy ókili Qaırat Nurtaımen birge Baıqońyr qalasynyń №277 mektep-lıtseıine bardy, dep habarlaıdy QazAqparat tilshisi.

Ǵarysh keshenin jalǵa alý jaǵdaıynda erekshe mártebege ıe Baıqońyr qalasynda qazaqstandyq jáne reseılik eki bilim berý júıesi jumys isteıdi. Qalada ornalasqan qazaq tilinde oqytatyn 5 mektep Qyzylorda oblysynyń Qarmaqshy aýdandyq bilim bólimine qaraıdy. Reseıdiń bilim mınıstrligine orys tilinde oqytatyn 7 mektep qaraıdy.

Qazaqstandyq bilim berý uıymdarynyń basshylarymen kezdesý barysynda oblystyq bilim basqarmasy basshysynyń mindetin atqarýshy Baǵdat Berdáýletov Baıqońyr qalasynyń bilim berý júıesiniń negizgi máseleleri týraly baıandady.

«Baıqońyrdaǵy Reseı mektepterinde Qazaqstan tarıhy, qazaq tili men ádebıeti pánderin oqytý máselelerin ekijaqty úkimetaralyq komıssııa pysyqtaýda», - dep atap ótti ol.

Sondaı-aq, oblys ákimi Qyzylorda óńirindegi úzdikterdiń biri sanalatyn №277 mektep-lıtseıiniń ozyq jobalarymen jáne jetistikterimen tanysty.