Baıqońyrdaǵy qazaq balalary Qazaqstan tarıhy men qazaq tili pánin qashan oqıdy
«Baıqońyr qalasynyń 7 mektebinde oqytý Reseı Federatsııasynyń Memlekettik jalpyǵa mindetti bilim berý standarttaryna sáıkes júrgiziledi. Bul mektepterde qazaqstandyq balalar da oqıdy. Olar óz bolashaǵyn Qazaqstanmen baılanystyratyndyqtan, olar úshin Qazaqstan tarıhyn, qazaq tili men ádebıetin bilý mańyzdy bolyp tabylady. Mektep baǵdarlamasyna atalǵan pánderdi engizý úshin Reseı Federatsııasynyń Oqý-aǵartý mınıstrliginiń ruqsaty qajet», - dedi Úkimet basshysy.
Onyń atap ótýinshe, Baıqońyr qalasyndaǵy reseılik mektepterde Qazaqstan tarıhy, qazaq tili men ádebıeti pánderin oqytý týraly másele Bilim berý salasyndaǵy yntymaqtastyq jónindegi úkimetaralyq komıssııanyń 22-shi otyrysynyń kún tártibine engizildi. Otyrys 2020 jylǵy 10 qarashada ótti.
«Alaıda Baıqońyr qalasy boıynsha Qazaqstan-Reseı úkimetaralyq komıssııasynyń bólek otyrysynda qaraýdyń oryndylyǵy týraly sheshim qabyldanyp, atalǵan másele kún tártibinen alynyp tastaldy. Baıqońyr qalasyndaǵy 7 mekteptiń bireýin Reseı Federatsııasynyń balansynan alyp Qazaqstannyń kommýnaldyq menshigine berý máselesi de bilim berý salasyndaǵy yntymaqtastyq jónindegi úkimetaralyq kezekti komıssııanyń otyrysynda qarastyrylatyn bolady», - dedi Asqar Mamın.
Bul rette, Úkimet basshysy Qazaqstan Respýblıkasynyń azamattaryn qazaqstandyq Memlekettik jalpyǵa mindetti bilim berý standarttary boıynsha oqytý máselesin sheshý úshin 2019-2020 oqý jylynan bastap № 275 orta mekteptiń bazasynda orys tilinde oqytatyn bastaýysh synyptar (1-4 synyptarda – 80 oqýshy, sondaı-aq mektepaldy daıarlyq synybynda – 22 tárbıelenýshi) ashylǵanyn aıtady.
«Sonymen qatar 2020 jyly Qyzylorda oblysynyń ákimdigi Reseı Federatsııasy mektepterindegi qazaqstandyq 5-11 synyp oqýshylary úshin 2020-2021 oqý jylynda Qazaqstan Respýblıkasy standarty boıynsha orys tilinde oqytylatyn synyptardy (№ 275 mektep bazasynda) ashý boıynsha uıymdastyrý jumysyn júrgizdi. Keleshekte orys tilinde oqytatyn qosymsha synyptar ashýdy jalǵastyrý josparlanýda. Kóterilgen máseleler Úkimettiń baqylaýynda», - dedi Premer-Mınıstr.