«Baıqońyrdaǵy alty mekteptiń máselesi sheshildi» - baspasózge sholý

ASTANA. QazAqparat - «QazAqparat» halyqaralyq aqparattyq agenttigi 2 qyrkúıek, seısenbi kúni jaryq kórgen respýblıkalyq buqaralyq aqparat quraldaryndaǵy ózekti maqalalarǵa sholýdy usynady.

***

«Egemen Qazaqstan» gazetiniń búgingi sanynda Densaýlyq saqtaý jáne áleýmettik damý mınıstri Tamara Dúısenovamen bolǵan suhbat berilgen. «2015 jyly halyqty jumyspen qamtýǵa járdemdesýdiń bekitilgen óńirlik keshendi josparlarynyń sheńberinde 322 myń adamdy qamtý mejelenip otyr. Azamattardy jumysqa ornalastyrý «Jumyspen qamtýdyń jol kartasynyń» jáne «Nurly Jol» baǵdarlamasynyń, Indýstrııalyq-ınnovatsııalyq damý memlekettik baǵdarlamasy men basqa da memlekettik jáne salalyq baǵdarlamalar sheńberinde iske asyrylatyn jobalar arqyly júzege asyrylady. Óńirlerdiń derekteri boıynsha, búgingi kúnge 234 myń adam, onyń ishinde, turaqty jumys oryndaryna 121 myń adam jumysqa ornalastyryldy. Budan ózge, «Jumyspen qamtýdyń jol kartasy» sheńberinde kásiptik oqýdan ótýge, jeke isin ashýǵa, sýbsıdııalanatyn jumys oryndary men jastar praktıkasyna jumysqa ornalasýǵa nıet bildirgen jumyssyzdar men óz betinshe jumyspen qamtylǵan adamdarǵa memlekettik qoldaý kórsetýdi jalǵastyryp kelemiz. Sonymen qatar, azamattardyń jumys kúshi artyq óńirlerden eńbek resýrstaryna degen suranysy bar óńirlerge qonys aýdarýyna járdemdesýdemiz», - deıdi mınıstr. Ózekti máseleler kóterilgen suhbat «Eshkim de memleket nazarynan tys qalmaıdy» atty taqyryppen jarııalandy.

Bas basylymda «Aı men Aıdyn» degen kólemdi maqala berilgen. «Ǵaryshqa jiberseńiz, qaryshtap baryp-qaıtýǵa daıyn boldy. Olar Aıdyn Aıymbetov pen Muhtar Aımahanov edi. Osy eki jigittiń biri jańa zamannyń alǵashqy onjyldyǵynda aspanǵa ushýǵa tıis bolatyn. Jospar boıynsha. Deı turǵanmen, daǵdarys degen dúnıe tirsekten shalyp, oıǵa alǵan maqsat oryndalmaı qaldy. Bul jańalyqtan keıin Muhtar Aımahanov azamattyǵyn aýystyrdy. Al Aıdyn Aıymbetov Astanaǵa atbasyn burdy. Osylaı júrgende bıyl oıda-joqta jaǵymdy jańalyq estip, bórkimizdi aspanǵa attyq. «Qazaqstan ǵaryshkerine ǵaryshqa ushýǵa ruqsat berildi», degen. Solaısha, Aıymbetovtyń armany alty jylǵa keshigip oryndalyp jatqan jaǵdaıy bar. Bári jaqsy hám durys qoı. Biraq bir mezet ózińizge: «Men osy Aıdyn týraly ne bilemin?» dep suraq qoıyp kórińizshi. Ne biledi ekensiz? Aspanǵa attanaıyn dep turǵan azamatyńyz jaıynda qandaı aqparat bar? Biz búgin osy bir olqylyqtyń ornyn toltyrmaqqa talpyndyq»,-dep jazady maqala avtory.

***

«Aıqyn» gazetiniń jazýynsha, Ońtústik Qazaqstan oblysynyń ákimi Beıbit Atamqulov Shymkent qalasynda ornalasqan hımııa-bıologııa baǵytyndaǵy Nazarbaev zııatkerlik mektebine baryp, muǵalimder men oqýshylardy Bilim kúni merekesimen quttyqtady.

- Qazaqstandaǵy árbir úshinshi «Altyn belgi» ıegeri - Ońtús­tik Qazaqstan oblysy mektepteriniń túlegi. Oblysta 18 112 oqýshy UBT tapsyryp, olardyń ortasha kórsetkishi 78,8 balldy qurady. Bul - óte qýanyshty jaǵdaı. Munyń barlyǵy Ult kóshbasshysy Nursultan Nazarbaevtyń dana ári salmaqty saıasatynyń jemisi, - dep atap ótti óńir basshysy.

Sonymen qatar, ońtústikqazaqstandyq oqýshylar 2015 jyly alǵash ret respýblıkalyq pán olımpıadasynyń qorytyndysyna sáıkes, 2 baǵyt boıynsha júldeli úshinshi oryndy ıelengeni de belgili boldy. Oblys basshysy óz sózinde bıylǵy jańa oqý jylynda 70 myń­nan astam oqýshy mektep tabaldyryǵyn alǵash ret attaǵaly otyr­ǵa­nyna toqtaldy. - Bul - respýblıkadaǵy eń joǵary kórsetkish. Elimizdegi eń jo­ǵary týý kórsetkishi bizdiń oblysta tirkelip otyr. Turǵyndar­dyń ál-aýqaty jyldan-jylǵa jaqsaryp kele jatqany da talassyz, - dedi B.Atamqulov. Ońtústik Qazaqstan oblysy boıynsha, jańa oqý jylynda 49 jańa bilim berý mekemesi paıdalanýǵa berilse, sonyń 22-si keshe ashyldy. Bul jaıynda « Ońtústiktiń oqýshylary ozyp tur» atty maqaladan tolyq oqı alasyzdar.

Osy basylymda «Baıqońyrdaǵy alty mekteptiń máselesi sheshildi» degen maqala kópshilik nazaryna usynylyp otyr. Ótken jyldyń qarasha aıynda Ortalyq kommýnıkatsııalar qyzmetinde ótken brıfıng barysynda Qyzylorda oblysynyń ákimi Qyrymbek Kósherbaev Baıqońyrdaǵy alty qazaq mektebiniń jańa oqý jylynda qazaqstandyq standartqa kóshetinin málimdegen edi.

Brıfıngte ákim: «Baıqońyrda Qazaqstan balalary oqıtyn alty mektep bar. Olar Qazaqstannyń bilim standarty emes, Reseıdiń bilim standarty boıynsha bilim aldy. Qazaqtyń balalary qazaq mektebinde kitap betin ashady da, «prezıdentim Pýtın» deıdi. Erteń olar qandaı azamat, qandaı patrıot bolady dep aıta alamyz» degen edi. Sol joly ákim bul mektepterdi bitirgen qazaq oqýshylarynyń Ulttyq biryńǵaı testileýge qatysa almaıtynyn, sondyqtan elimizdegi joǵary oqý oryndaryna túse almaı qınalyp júrgenin aıtqan edi.

Mine, talaı jyldan beri tal­qyǵa túsip kelgen Baıqońyrdaǵy mek­tep­terdiń problemasy oń she­shimin tap­ty. «Juldyzdy qalashyqtaǵy» 6 qazaq mektebi elimizdiń bilim berý standar­tyna kóshti. Bilim kúni alǵash ret atalǵan mekteptiń tabal­dyryǵyn 642 baıqońyrlyq búl­dirshin attady. №277 K.Toqmuha­medov atyndaǵy mektepti ótken al­ǵash­qy qońyraý saltanatty sharasyna oblys ákimi Q.Kósher­baev qatysty. ***

Neke kelisimsharty áıelderge qaraǵanda erlerge qajet. Bundaı pikirdi osy jaıynda Astanada semınar ótkizbek bolyp otyrǵan Emın Askerov alǵa tartýda. «Ekspress K» gazetinde «Ý menıa vse hody zapısany» atty materıalda Qazaqstanda ajyrasýlar sany azaımaı turǵandyǵy atalyp ótken. Quqyq qorǵaýshylardyń paıymynsha, bul jaǵdaıǵa neke kelisimsharttary kómek kórsete alady. Bul ózekti taqyryptaǵy birinshi semınarǵa kóp adam jazylǵan eken.