Baıqońyrda Jeńis kúni toılandy

BAIQOŃYR. QazAqparat - Baıqońyrda búginshi Jeńis kúni saltanatty is-sharalarǵa toly boldy, dep habarlaıdy QazAqparat tilshisi. 

Baıqońyr qalasynyń turǵyndary, soǵys jáne tyl ardagerleri tańerteń qalalyq saıabaqtaǵy Jeńistiń 50 jyldyǵy eskertkishiniń aldyna jınalyp, gúl shoqtaryn qoıdy. Ekinshi dúnıejúzilik soǵysta qaza tapqandardy bir mınýt únsizdikpen eske aldy.

Keıin Reseı jáne Qazaqstan polıtsııasynyń qyzmetkerleri sherýge qatysýshylardyń aldynan saltanatty marshpen júrip ótti.

Búgingi merekege qaladaǵy jalǵyz soǵys ardageri, 96 jastaǵy Qulmyrza Jolmanov pen 70 tyl ardageri shaqyryldy. Jeńis kúnin merekeleýdiń basty oqıǵasy - «Baıqońyrdyń Jaýyngerlik polki» aktsııasy boldy.


Alańnan qalalyq avto jáne motoklýb músheleriniń qatysýymen avto jáne mototehnıka tizbegi ótti.

Aıta keteıik, Baıqońyr avtoáýesqoılary 9 mamyr qarsańynja fleshmob uıymdastyryp, áleýmettik jelilerge vıdeo jarııalaǵan bolatyn.
Keıin merekeni atap ótý sharasy qalalyq saıabaqta jalǵasty. Jeńis kúnin toılaý barysynda keshkisin Ortalyq alańda úlken kontsert ótip, otshashýmen aıaqtalady.



Baıqońyr qalasy ákimshiliginiń baspasóz qyzmetinen habarlanǵandaı, 9 mamyr qarsańynda barlyq soǵys, tyl ardegerleriniń úılerin aralap, olarǵa azyq-túlik jıyntyqtary tabystalǵan.