Baıqońyrda «Zenıt» keshenine qatysty qandaı jospar bar
Otyrys barysynda depýtat Evgenıı Kozlov atalǵan nysandar týraly mınıstrge saýal qoıdy.
«Ózderińizge belgili, ǵarysh salasynda qazaqstandyq-reseılik yntymaqtastyqty óristetý maqsatynda ótken jyly Baıqońyrda bizdiń elimizge 243 nysandy qamtıtyn «Zenıt» zymyran kesheni ınfraqurylymyn ótkizý qadamy jasaldy. Osyǵan baılanysty atalǵan keshendi birlesip paıdalanýdan qandaı nátıje kútip otyrsyzdar ? Sonymen qatar bolashaqta iske asyrylatyn jobalar týraly aıtyp berseńiz», - dep surady depýtat.
Óz kezeginde Asqar Jumaǵalıev keıbir nysandar ǵarysh baǵdarlamasyna qatyspaıtynyn jáne olar ákimdik quzyretine ótetinin atap ótti.
«Jańa Siz atap ótken nysandar Qazaqstannyń jalpy ǵarysh salasyn damytýǵa óte qajet. Búginde biz «Báıterek» dep atalatyn tıisti jobany ázirlep jatyrmyz. Ony jańǵyrtý sharalaryna belgili bir ýaqyt kerek bolyp tur. Qazirgi kezde Reseıdegi áriptesterimizben tehnıkalyq-ekonomıkalyq negizdemeniń barlyq máselelerin pysyqtaýdamyz», - dedi vedomstvo basshysy.
Osy oraıda mınıstr atalǵan tehnıkalyq-ekonomıkalyq negizdemeler aıaqtalǵannan keıin, bul baǵyttardy damytýǵa qatysty sheshimder qabyldatanyn jetkizdi. Naqty «Zenıt-M» júıesin iske qosý men «Báıterek» jobasyn damytý eskerilgen.
«Berilgen nysandar Qazaqstanǵa óte úlken qyzmet kórsete alatynyn, sondaı-aq elimizdiń ǵarysh salasyn damytýǵa úles qosatynyn jaqsy túsinemiz», - dedi mınıstr.
Budan buryn habarlanǵandaı, Parlament Májilisiniń jalpy otyrysynda «1995 jylǵy 23 jeltoqsandaǵy Qazaqstan men Reseı arasyndaǵy Baıqońyr qalasynyń mártebesi jáne ondaǵy atqarýshy ókimet organdaryn qurýdyń tártibi men olardyń mártebesi týraly kelisimge ózgeris engizý týraly hattamany ratıfıkatsııalaý týraly» zań jobasy maquldandy.
Bul qujatqa sáıkes, Baıqońyrda qazaqstandyq memorgandar tizbesi taǵy 10 qurylymǵa tolyǵady.