Baıqońyrda úsh aılyq úzilisten keıin zymyran ushyrylady

BAIQOŃYR. QazAqparat – Búgin Baıqońyr ǵarysh aılaǵynda úshinshi ret zymyran ushyrý kúni jarııalandy. Ǵarysh saparyna úsh kún qaldy, dep habarlaıdy QazAqparat tilshisi.

Bul joly ushyrýǵa «Progress MS-24» júk kemesi bar «Soıýz-2.1a» ǵaryshtyq zymyranyn (RKN) daıyndap jatyr. Tańerteń RKN montajdaý-synaý kesheninen shyǵaryldy jáne temirjol arqyly №31 ushyrý alańyna jetkizildi.

Ushyrý kesheninde zymyrandy tik kúıge ornatqannan keıin «Roskosmos» memlekettik korporatsııasy kásiporyndarynyń mamandary ony ushyrýǵa daıyndaý jumystaryn jalǵastyrdy. Birneshe táýlik ishinde zymyran tasyǵysh, jerústi jabdyqtaryna tekserý júrgiziletin bolady.

«Progress MS-24» júk kemesin «Soıýz-2.1a» zymyran tasyǵyshymen ushyrý 23 tamyzda Astana ýaqyty boıynsha 7 saǵat 8 mınýtta josparlanǵan.

Ǵaryshtyq júk kóligi HǴS-qa stantsııanyń jumysyn qoldaý jáne ekıpajdardyń tirshiligin qamtamasyz etý úshin shamamen 2,5 tonna júk jetkizedi.

Bul Baıqońyrdan úsh aılyq úzilisten keıingi alǵashqy ushyrylym bolmaq. Qazaqstandyq ǵarysh aılaǵynan buǵan deıingi ushyrý 24 mamyrda «Progress MS-23» júk kemesi halyqaralyq ǵarysh stantsııasyna (HǴS) attanǵan kezde júzege asyrylǵan.

Búginde Halyqaralyq ǵarysh stantsııasynda 69-shy uzaq merzimdi ekspedıtsııa ekıpajy jumys istep jatyr. Onyń quramynda Roskosmos ǵaryshkerleri Sergeı Prokopev (HǴS-69 komandıri), Dmıtrıı Petelın jáne Andreı Fedıaev, sondaı-aq NASA astronavttary Frantsısko Rýbıo, Stıven Boýen, Ýorren Hobýrg jáne BAÁ astronavty Sultan al-Neıadı bar.