Baıqońyrda «Proton-M» zymyrany ǵaryshqa ushyrylady

BAIQOŃYR. QazAqparat - Baıqońyr ǵarysh aılaǵynan 2019 jyldyń mamyr aıynyń sońynda zymyran ushyrylady. «Proton-M» zymyrany Reseıdiń «ıAmal-601» spýtnıktik baılanysyn ǵaryshqa alyp ushý úshin 24 sáýirde Baıqońyrǵa jetkizildi, dep habarlaıdy QazAqparat tilshisi.

«Proton-M» ǵarysh zymyranynyń qurylymdyq bólikteri bar eshelony Máskeýden «Tıýra-Tam» temirjol stantsııasyna keldi. Zymyran keden protsedýralarynan ótkennen keıin ǵarysh aılaǵy «Proton» ǵarysh zymyran kesheniniń tehnıkalyq keshenine jetkizildi. Bul jerde taıaý kúnderi zymyrandy ushyrýǵa daıarlaý boıynsha josparly tehnologııalyq operatsııalar bastalady, dep habarlady Roskosmostyń baspasóz qyzmeti.

«ıAmal-601» ǵarysh apparatyn Thales Alenia Space France frantsýz kompanııasy «Gazprom ǵarysh júıesiniń» tapsyrysymen jasaǵan.

«Proton-M» zymyrany «Brız-M» údemeli blokpen jáne «ıAmal-601» ǵarysh apparatymen Reseı Federatsııasynyń teleradıo habar taratýdy damytý boıynsha federaldyq maqsatty baǵdarlamasy aıasynda ushyrylady, dep atap ótti Reseıdiń ǵarysh vedomstvosynyń baspasóz qyzmeti.

Bekitilgen josparǵa sáıkes, «Proton-M» zymyran-tasyǵyshy «ıAmal-601» ǵarysh apparatymen birge Baıqońyr aılaǵynan 2019 jyldyń 29 mamyrynda ushyrylady. «Proton-M» zymyrany osy jyly alǵash ret Baıqońyr ǵarysh aılaǵynan ushyrylmaq.

Avtor: Sara Qabıqyzy