Baıqońyrda karantın taǵy bir aptaǵa sozyldy
Eki apta buryn shuǵyl shtab karantındi 2 tamyzdan bastap jumsartýdy josparlaǵan edi. Statıstıkaǵa sensek, shilde aıynda aýrý juqtyrý deńgeıi birshama tómendegen, biraq bul kórsetkish áli ornyqty emes. Sondyqtan shekteý sharalary taǵy bir aptaǵa, ıaǵnı 9 tamyzǵa deıin uzartyldy.
Shuǵyl shtab músheleri azyq-túlikke jatpaıtyn taýarlardyń taza aýadaǵy saýdasyn qaıta jandandyrý usynysyn qoldady. Oqshaýlaný rejıminiń ýaqyty - túngi 23:00-den tańǵy 06:00-ǵa deıin.
3 tamyzdan bastap Baıqońyr qalasyna kireberistegi ótkizý beketinde qaýipsizdik basqarmasy men qalalyq ákimshilik mamandary jumys isteıdi. Olar Tóretam men Aqaı eldimekenderi turǵyndarynyń shuǵyl jaǵdaıda qalaǵa bir márte kirip-shyǵýyna jáne qala halqynyń qaladan shyǵýyna ruqsat beretin qujattardy rásimdeıdi.
«Kelesi aptanyń sońyna qaraı shahar aýmaǵynda koronavırýs ınfektsııasy jaǵdaıynyń damý úrdisi aıqynyraq kórinedi. Bul medıtsına mamandarynyń shekteý sharalaryn ári qaraı qataıtý kerek pe, álde jumsartqan jón be - sol jóninde naqty sheshim shyǵarýyna múmkindik beredi» dep atap ótti shuǵyl shtab tóraǵasy, Baıqońyr qalasy ákimshiliginiń basshysy Konstantın Býsygın.
Resmı málimet boıynsha, 31 shildege deıin qalada 959 adamnyń koronavırýs juqtyrǵany belgili bolǵan. 90 adam ınfektsııalyq statsıonarda em alyp jatyr. 1 maýsym men 31 shilde aralyǵynda 351 naýqas indetten jazylyp, úıine shyqqan, 60 syrqat qaıtys bolǵan.
Avtor: Sara Qabıqyzy